சேலம் சீலநாயக்கன்பட்டியில் கொத்தனாரிடம் வழிப்பறி; வாலிபர் கைது

அன்னதானப்பட்டி:

பனமரத்துப்பட்டி அருந்ததியர் தெருவை சேர்ந்தவர் மூர்த்தி (வயது 38), கொத்தனார். இவர் நேற்று சீலநாயக்கன்பட்டி பைபாஸ் இரட்டை கோவில் அருகே நடந்து சென்று கொண்டிருந்தார். அப்போது அங்கு வந்த ஒருவர் மூர்த்தியை திடீரென வழிமறித்து, கத்தியை காட்டி மிரட்டி தாக்கினார். பின்னர் மூர்த்தியிடம் இருந்து ரூ.5 ஆயிரத்தை பறித்து கொண்ட அவர் பிடிக்க வந்த அருகில் இருந்த நபர்களை தாக்கி விட்டு அங்கிருந்து தப்பி ஓடி விட்டார்.

இது குறித்த புகாரின் பேரில் அன்னதானப்பட்டி போலீசார் வழக்குப்பதிவு செய்து விசாரணை நடத்தினர். இதில் வழிப்பறியில் ஈடுபட்டது சன்னியாசிகுண்டு பகுதியை சேர்ந்த நிர்மல் தாஸ் (22) என தெரியவந்தது. இதையடுத்து அவரை கைது செய்த போலீசார் அவரிடமிருந்து பணத்தை மீட்டனர்.