வடமதுரை அருகே பசுமாட்டை திருடியவர் கைது

வடமதுரை அருகே உள்ள தாமரைப்பாடியை சேர்ந்தவர் சின்னமுருகன் (வயது 55). இவர், தனது வீட்டில் பசு மாடு ஒன்றை வளர்த்து வந்தார். இந்தநிலையில் கடந்த 13-ந்தேதி இரவு தனது வீட்டின் வெளியே பசுவை கட்டி வைத்துவிட்டு தூங்க சென்றார். மறுநாள் காலை சின்னமுருகன் எழுந்து பார்த்தபோது, வீட்டின் வெளியே கட்டியிருந்த பசுமாடு மாயமாகி இருந்தது. இதனைக்கண்டு அதிர்ச்சியடைந்த அவர், இதுகுறித்து வடமதுரை போலீஸ் நிலையத்தில் புகார் அளித்தார். அதன்பேரில் போலீஸ் சப்-இன்ஸ்பெக்டர் பிரபாகரன் வழக்குப்பதிவு செய்து விசாரணை நடத்தினார்.

மேலும் அப்பகுதியில் உள்ள கண்காணிப்பு கேமராக்களில் பதிவான காட்சிகளை போலீசார் பார்வையிட்டனர். அதில், 13-ந்தேதி அன்று நள்ளிரவில் மர்மநபர் ஒருவர், பசுமாட்டை கயிற்றுடன் இழுத்துச் சென்றது பதிவாகி இருந்தது. இதையடுத்து போலீசார் நடத்திய விசாரணையில், சின்னமுருகனின் பசுமாட்டை திருடியது தாமரைப்பாடி குறிஞ்சிநகரை சேர்ந்த சிவக்குமார் (வயது 45) என்பதும், அவர் திருடிய பசுமாட்டை முள்ளிப்பாடி பகுதியில் விற்க முயன்றதும் தெரியவந்தது. இதையடுத்து சிவக்குமாரை போலீசார் கைது செய்தனர்.