கலைகளில் சிறந்து விளங்கும் கலைஞர்கள் விருது பெற விண்ணப்பிக்கலாம்

இயல், இசை, நாடகம் ஆகிய கலைகளில் சிறந்து விளங்கும் கலைஞர்கள் விருது பெற விண்ணப்பிக்கலாம் என்று கலெக்டர் சாருஸ்ரீ தெரிவித்துள்ளார். இதுகுறித்து அவர் வெளியிட்டுள்ள செய்திக்குறிப்பில் கூறியிருப்பதாவது:-

கலைவிருதுகள்

தமிழ்நாட்டின் கலைப்பண்புகளை மேம்படுத்தவும் மற்றும் பாதுகாக்கும் நோக்கில் கலைஞர்களின் கலைத்திறனை சிறப்பிக்கும் வகையில் கலை பண்பாட்டுத்துறையின் கீழ் மாவட்ட கலை மன்றங்களின் வாயிலாக மாவட்டம் தோறும் 15 பேருக்கு 2002-2003-ம் ஆண்டு முதல் வயது மற்றும் கலைப்புலமைக்கு ஏற்றவாறு கலைவிருதுகள் வழங்கப்பட்டு வருகிறது.

அதன்படி திருவாரூர் கலை மன்றத்தின் வாயிலாக திருவாரூர் மாவட்டத்தில் இயல், இசை, நாடகம் ஆகிய கலைகளில் ஒன்று அல்லது ஒன்றுக்கு மேற்பட்ட கலைகளில் சிறந்து விளங்கும் 15 கலைஞர்களுக்கு வயது மற்றும் கலை புலமை அடிப்படையில் விருதுகள் வழங்க தேர்வாளர்குழு விரைவில் கூட்டப்படவுள்ளது.

சிறந்து விளங்கும் கலைஞர்கள்

எனவே திருவாரூர் மாவட்டத்தை சேர்ந்த, பாட்டு, பரதநாட்டியம், ஓவியம், மயிலாட்டம், பாவைக்கூத்து, தோல்பாவை, நையாண்டிமேளம், கரகாட்டம், காவடியாட்டம், பொய்க்கால் குதிரையாட்டம், மரக்கால் ஆட்டம், கோல்கால் ஆட்டம், கழியல் ஆட்டம், புலியாட்டம், காளையாட்டம், மானாட்டம், பாம்பாட்டம், ஆழியாட்டம், சிலம்பாட்டம் (வீரக்கலை) மற்றும் இசைக்கருவிகள் வாசித்தல் முதலிய நாட்டுப்புறக்கலைகள் மற்றும் செவ்வியல் கலைகள் என அனைத்து வகை முத்தமிழ் கலைகளில் சிறந்து விளங்கும் கலைஞர்களிடம் இருந்து விண்ணப்பங்கள் வரவேற்கப்படுகிறது.

திருவாரூர் மாவட்டத்தை சேர்ந்த கலைஞர்கள் விண்ணப்பத்துடன் வயது சான்று மற்றும் கலைத்தொடர்பான சான்றிதழ்களின் நகல்களுடன் விண்ணப்பிக்க வேண்டும். மேலும் தேசிய விருது, மாநில விருது மற்றும் மாவட்ட கலை மன்றத்தால் வழங்கப்பட்ட விருதுகள் பெற்ற கலைஞர்கள் இந்த விருதுக்கு விண்ணப்பம் செய்யக்கூடாது. வருகிற 20- ந் தேதிக்குள் தஞ்சை மண்டல கலை பண்பாட்டு மைய உதவி இயக்குனர் அலுவலகத்தில் விண்ணப்பிக்க வேண்டும். இவ்வாறு அதில் கூறப்பட்டு உள்ளது.