அந்தியூர் கால்நடை சந்தையில் கொங்கு காளை மாடு ஜோடி ரூ.1¾ லட்சத்துக்கு விற்பனை

அந்தியூர்

அந்தியூர் கால்நடை சந்தையில் கொங்கு காளை மாடு ஜோடி ரூ.1¾ லட்சத்துக்கு விற்பனை ஆனது.

கால்நடை சந்தை

அந்தியூரில் உள்ள கால்நடை சந்தையில் நேற்று மாடு விற்பனை நடைபெற்றது. இந்த சந்தைக்கு மேட்டூர், கொங்கணாபுரம், பண்ணவாடி, கொளத்தூர், எடப்பாடி, தர்மபுரி பர்கூர், ஈரோடு உள்பட பல்வேறு பகுதிகளில் இருந்து ஏராளமான மாடுகள் விற்பனைக்காக கொண்டு வரப்பட்டன.

இதில் நாட்டு பசு மாடு ஒன்று குறைந்தபட்ச விலையாக ரூ.30 ஆயிரத்துக்கும், அதிகபட்ச விலையாக ரூ.75 ஆயிரத்துக்கும், சிந்து பசு மாடு ஒன்று குறைந்தபட்ச விலையாக ரூ.20 ஆயிரத்துக்கும், அதிகபட்ச விலையாக ரூ.40 ஆயிரத்துக்கும், ஜெர்சி பசு மாடு ஒன்று குறைந்தபட்ச விலையாக ரூ.25 ஆயிரத்துக்கும், அதிகபட்ச விலையாக ரூ.45 ஆயிரத்துக்கும், எருமை மாடு ஒன்று குறைந்தபட்ச விலையாக ரூ.30 ஆயிரத்துக்கும் அதிகபட்ச விலையாக ரூ.80 ஆயிரத்துக்கும், பர்கூர் இன பசு மாடு ஒன்று குறைந்தபட்ச விலையாக ரூ.10 ஆயிரத்துக்கும், அதிகபட்ச விலையாக ரூ.25 ஆயிரத்துக்கும், கன்றுக்குட்டி ஒன்று குறைந்தபட்ச விலையாக ரூ.5 ஆயிரத்துக்கும், அதிகபட்ச விலையாக ரூ.15 ஆயிரத்துக்கும் விற்பனை செய்யப்பட்டது.

ரூ.1¾ லட்சம்

கொங்கு காளை மாடு ஜோடி குறைந்தபட்ச விலையாக ரூ.80 ஆயிரத்துக்கும், அதிகபட்ச விலையாக ரூ.1 லட்சத்து 80 ஆயிரத்துக்கும், காங்கேயம் காளை மாடு ஜோடி குறைந்தபட்ச விலையாக ரூ.75 ஆயிரத்துக்கும், அதிகபட்ச விலையாக ரூ.1 லட்சத்து 50 ஆயிரத்துக்கும் விற்பனை ஆனது.

அடுத்த மாதம் பொங்கல் பண்டிகை கொண்டாடப்பட உள்ளதால் விவசாயிகள் போட்டி போட்டு அதிக அளவில் மாடுகளை வாங்கி சென்றனர். இதனால் மாடுகள் விலை அதிகரித்து விற்பனை ஆயின.

ஈரோடு, திருப்பூர், கோவை, சத்தியமங்கலம், பொள்ளாச்சி உள்பட பல்வேறு பகுதிகளில் இருந்து ஏராளமான விவசாயிகள் மற்றும் வியாபாரிகள் இங்கு வந்து மாடுகளை விலை பேசி பிடித்து சென்றனர்.