அந்தியூர் கூட்டுறவு சங்கத்தில் ரூ.3¾ லட்சத்துக்கு வாழைத்தார் ஏலம்

அந்தியூர்

அந்தியூர் புதுப்பாளையம் வேளாண்மை உற்பத்தியாளர் கூட்டுறவு சங்கத்தில் வாழைப்பழம் ஏலம் நடைபெற்றது. இந்த ஏலத்துக்கு அந்தியூர், வெள்ளித்திருப்பூர், சென்னம்பட்டி, ஜரத்தல், ஒலகடம், அத்தாணி, ஆப்பக்கூடல் உள்பட பல்வேறு பகுதிகளில் இருந்து ஏராளமான விவசாயிகள் 2 ஆயிரத்து 950 வாழைத்தார்களை விற்பனைக்காக கொண்டு வந்திருந்தனர்.

இதில் கதலி வாழைப்பழம் கிலோ ஒன்று 30 ரூபாய்க்கும், நேந்திரம் 28 ரூபாய்க்கும் விற்பனை ஆனது. பூவன் (தார் ஒன்று) ரூ.200-க்கும், செவ்வாழை ரூ.550-க்கும், தேன்வாழை ரூ.400-க்கும், மொந்தன் ரூ.250-க்கும், ரொபஸ்டா ரூ.220-க்கும் என மொத்தம் வாழைப்பழத்தார் ரூ.3 லட்சத்து 82 ஆயிரத்துக்கு ஏலம் போனது. ஈரோடு, பெருந்துறை, சத்தியமங்கலம், கோவை, மேட்டுப்பாளையம் உள்பட பல்வேறு பகுதிகளை சேர்ந்த வியாபாரிகள் வாழைப்பழத்தார்களை ஏலம் எடுத்து சென்றனர்.