சீனாபுரம் கால்நடை சந்தையில் ரூ.1½ கோடிக்கு மாடுகள் விற்பனை

சீனாபுரம் கால்நடை சந்தையில் ரூ.1½ கோடிக்கு மாடுகள் விற்பனை ஆனது.

கால்நடை சந்தை

பெருந்துறை அருகே உள்ள சீனாபுரத்தில் கால்நடை சந்தை நடைபெற்றது. இந்த சந்தைக்கு சேலம் மாவட்டம் முத்துநாயக்கன்பட்டி, தர்மபுரி மாவட்டம் காரிமங்கலம், நாமக்கல் மாவட்டம் திருச்செங்கோடு, மோர்ப்பாளையம் மற்றும் ஈரோடு மாவட்டத்தில் மொடக்குறிச்சி, அறச்சலூர், எழுமாத்தூர், அவல்பூந்துறை, வெள்ளோடு உள்பட பல்வேறு பகுதிகளில் இருந்து ஏராளமான விவசாயிகள் விர்ஜின் கலப்பின பசு மாடுகள் 120-ம், அதன் கிடாரி கன்றுக்குட்டிகள் 150-ம், சிந்து மற்றும் ஜெர்சி இன பசு மாடுகள் 100-ம், அதன் கிடாரி கன்றுக்குட்டிகள் 175-ம் விற்பனைக்காக கொண்டு வந்திருந்தனர்.

இதில் விர்ஜின் கலப்பின பசு மாடு ஒன்று ரூ.40 ஆயிரம் முதல் ரூ.55 ஆயிரம் வரையும், அதன் கிடாரி கன்றுக்குட்டி ஒன்று ரூ.30 ஆயிரம் முதல் ரூ.40 ஆயிரம் வரையும் விற்பனை ஆனது. சிந்து மற்றும் ஜெர்சி இன பசு மாடு ஒன்று ரூ.30 ஆயிரம் முதல் ரூ.40 ஆயிரம் வரையும், அதன் கிடாரி கன்றுக்குட்டி ஒன்று ரூ.10 ஆயிரம் முதல் ரூ.30 ஆயிரம் வரையும் விற்பனை செய்யப்பட்டது.

ரூ.1½ கோடி

கடந்த வாரத்தை காட்டிலும் விர்ஜின் கலப்பின பசு மாடு ஒன்று ரூ.5 ஆயிரம் முதல் ரூ.10 ஆயிரம் வரையும், சிந்து மற்றும் ஜெர்சி இன பசு மாடு ஒன்று ரூ.3 ஆயிரம் முதல் ரூ.5 ஆயிரம் வரையும் விலை உயர்ந்து விற்பனையானதாக வியாபாரிகள் தெரிவித்தனர். சீனாபுரம் சந்தையில் மாடுகள் மொத்தம் ரூ.1 கோடியே 50 லட்சத்துக்கு விற்பனை ஆனதாக சந்தை நிர்வாகிகள் தெரிவித்தனர்.

திருப்பூர், பெருமாநல்லூர், செங்கப்பள்ளி, ஊத்துக்குளி, குன்னத்தூர், திங்களூர், நல்லாம்பட்டி, காஞ்சிக்கோவில், பெத்தாம்பாளையம், நசியனூர், கதிரம்பட்டி, அவல்பூந்துறை, அறச்சலூர், சிவகிரி உள்பட பல்வேறு பகுதிகளில் இருந்து வந்திருந்த ஏராளமான விவசாயிகள் மற்றும் வியாபாரிகள் மாடுகளை வாங்கிச் சென்றனர்.