சீனாபுரம் சந்தையில் ரூ.1 கோடிக்கு மாடுகள் விற்பனை

பெருந்துறை

பெருந்துறையை அடுத்துள்ள சீனாபுரத்தில் நேற்று வெள்ளிக்கிழமை மாட்டு சந்தை கூடியது. நாமக்கல் மாவட்டம் மோர்ப்பாளையம், சேலம் மாவட்டம் முத்தநாயக்கன்பட்டி, தர்மபுரி மாவட்டம் காரிமங்கலம் மற்றும் ஈரோடு மாவட்டத்தின் பல்வேறு பகுதிகளில் இருந்து, விர்ஜின் கலப்பின கறவை மாடுகள் 60-ம், இதே இன கிடாரிக்கன்றுகள் 100-ம் விற்பனைக்கு கொண்டுவரப்பட்டிருந்தன. இதேபோல் சிந்து மற்றும் ஜெர்சி இன கறவை மாடுகள் 100-ம், இதே இன கிடாரி கன்றுகள் 140-ம் விற்பனைக்கு கொண்டுவரப்பட்டிருந்தன.

சந்தையில் விர்ஜின் கலப்பின கறவை மாடு ஒன்று ரூ.35 ஆயிரம் முதல் ரூ.45 ஆயிரம் வரையிலும், இதே இன கிடாரி கன்று ஒன்று ரூ.25 ஆயிரம் முதல் ரூ.35 ஆயிரம் வரையிலும் விற்பனையானது.

சிந்து மற்றும் ஜெர்சி கறவை மாடு ஒன்று ரூ.25 ஆயிரம் முதல் ரூ.30 ஆயிரம் வரையிலும், இதே இன கிடாரி கன்று ஒன்று ரூ.8 ஆயிரம் முதல் ரூ.20 ஆயிரம் வரையிலும் விற்பனையானது. நேற்றைய சந்தையில் மாடுகள் மற்றும் கன்றுகள் ரூ.1 கோடிக்கு விற்றதாக வியாபாரிகள் தெரிவித்தனர்.