அமர்ந்தாளம்மன், துர்கா பரமேஸ்வரி கோவில் தேரோட்டம்

மயிலாடுதுறை அருகே சேந்தங்குடியில் அமர்ந்தாளம்மன், துர்கா பரமேஸ்வரி கோவில் உள்ளது. இந்த கோவிலில் பங்குனி உற்சவ திருவிழா கடந்த மாதம் 22-ந் தேதி காப்பு கட்டுதலுடன் தொடங்கியது. விழா நாட்களில் தினமும் அம்பாளுக்கு அபிஷேக, ஆராதனைகளும், அம்பாள் வீதி உலாவும் நடந்தன. தொடர்ந்து தேரோட்டம் நடந்தது. இதையொட்டி அமர்ந்தாளம்மன் மற்றும் துர்கா பரமேஸ்வரி 2 தேர்களில் தனித்தனியாக எழுந்தருளினர். வழியெங்கும் வீடுகளின் முன்பு பக்தர்கள் மாவிளக்கு இட்டும், தீபாராதனை எடுத்தும் வழிபட்டனர். தேர் முக்கிய வீதிகளின் வழியாக வலம் வந்து மீண்டும் நிலையை அடைந்தது. இதில் திரளான பக்தர்கள் கலந்து கொண்டு சாமி தரிசனம் செய்தனர்.