டாஸ்மாக் ஊழியர் மீது தாக்குதல்

நெல்லை:

நெல்லை அருகே தேவர்குளம் பகுதியைச் சேர்ந்தவர் ஜெயக்குமார் (வயது 43). இவர் பாளையங்கோட்டை மகாராஜநகரில் உள்ள டாஸ்மாக் கடையில் விற்பனையாளராக வேலை செய்து வருகிறார். இவர் நேற்று வழக்கம்போல் டாஸ்மாக் கடையில் பணியில் இருந்தார்.

அப்போது மாலையில் அங்கு வந்த மர்மநபர் திடீரென்று ஜெயக்குமாரிடம் தகராறு செய்தார். பின்னர் அவர் திடீரென்று மதுபாட்டிலை எடுத்து ஜெயக்குமார் தலையில் தாக்கினார். இதில் பலத்த காயமடைந்த ஜெயக்குமாரை தனியார் ஆஸ்பத்திரியில் அனுமதித்து சிகிச்சை அளித்தனர். இதுகுறித்து பெருமாள்புரம் போலீசார் வழக்குப்பதிவு செய்து, தலைமறைவான மர்மநபரை வலைவீசி தேடி வருகின்றனர்.