30 சிறந்த கலைஞர்களுக்கு விருதுகள்:கலெக்டர் தகவல்

கலை விருதுகள்

தேனி மாவட்ட கலெக்டர் ஷஜீவனா வெளியிட்டுள்ள செய்தி குறிப்பில் கூறப்பட்டுள்ளதாவது:-

தமிழகம் முழுவதும் கலை பண்பாட்டுத் துறையின் கீழ் மாவட்ட கலெக்டர் தலைமையில் செயல்படும், மாவட்ட கலை மன்றங்கள் மூலமாக ஒவ்வொரு மாவட்டத்திலும் வயது மற்றும் கலை புலமையின் அடிப்படையில் சிறந்த கலைஞர்களுக்கு விருதுகள் வழங்க தமிழக அரசு உத்தரவிட்டுள்ளது. தமிழ்நாட்டின் கலை பண்புகளை மேம்படுத்தவும், பாதுகாக்கும் நோக்கிலும், கலைஞர்களின் கலைத் திறனை சிறப்பிக்கும் வகையிலும் இந்த விருதுகள் 2002-2003-ம் நிதியாண்டு முதல் வழங்கப்பட்டு வருகிறது.

தற்போது, 2022-2023 மற்றும் 2023-2024-ம் ஆண்டுகளுக்கான கலை விருதுகள் வழங்கப்பட உள்ளன. இயல், இசை, நாடகம் முதலிய கலைகளில் ஒன்று அல்லது ஒன்றுக்கு மேற்பட்ட கலைகளில் சிறந்து விளங்கும் 15 கலைஞர்களுக்கு விருதுகள் வழங்க மாவட்ட கலெக்டர் தலைமையில் தேர்வாளர் குழு அமைக்கப்பட்டு உள்ளது.

விண்ணப்பிக்கலாம்

எனவே தேனி மாவட்டத்தை சேர்ந்த பாட்டு, பரதநாட்டியம், கும்மி, கோலாட்டம், ஒயிலாட்டம், தேவராட்டம், தோல்பாவை, கூத்து, பொம்மலாட்டம், நையாண்டி மேளம், கரகாட்டம், காவடி, பொய்க்கால் குதிரை ஆட்டம், மரக்காலாட்டம், கோல்கால் ஆட்டம், கணியான் கூத்து, ஓவியம்.

சிற்பம், அரசன், அரசி ஆட்டம், புலி ஆட்டம், காளையாட்டம், கைச் சிலம்பாட்டம், சிலம்பாட்டம் மற்றும் வில்லிசை முதலிய செவ்வியல் கலைகள், நாட்டுப்புற கலைகள் என அனைத்து வகை முத்தமிழ் கலைகளில் சிறந்து விளங்கும் கலைஞர்களிடம் இருந்து விண்ணப்பங்கள் பெறப்படுகின்றன.

அதன்படி, கலை இளமணி விருது, கலை வளர்மணி விருது, கலைசுடர்மணி விருது, கலை நன்மணி விருது, கலை முதுமணி விருதும் வழங்கப்பட உள்ளது. வயது மற்றும் கலை திறமையின் அடிப்படையில் தேர்ந்தெடுக்கப்படும் சிறந்த 30 கலைஞர்களுக்கு பொற்கிழி பட்டயம் மற்றும் பொன்னாடை வழங்கப்படும்.

மேலும் தேனி மாவட்டத்தைச் சேர்ந்த தகுதிவாய்ந்த கலைஞர்கள் விருதுகள் பெறுவதற்கான விண்ணப்பத்துடன் வயது சான்று, முகவரி சான்று மற்றும் கலை அனுபவம் சான்றுகளின் நகல்களுடன், 'உதவி இயக்குனர், மண்டல கலை பண்பாட்டு மையம், பாரதி முதல் தெரு, ரேஸ்கோர்ஸ் காலனி, மதுரை' என்ற முகவரிக்கு வருகிற ஜூலை மாதம் 15-ந் தேதிக்குள் விண்ணப்பிக்க வேண்டும்.

இவ்வாறு அதில் கூறப்பட்டுள்ளது.