தாயை இழந்த குட்டி யானைகளை தேடும் பணி தீவிரம்

தேன்கனிக்கோட்டை

மாரண்டஅள்ளி அருகே மின்சாரம் தாக்கி 3 யானைகள் இறந்ததால் தாயை இழந்த 2 குட்டிகளை காளிகட்டா வனப்பகுதியில் தேடும் பணியில் வனத்துறையினர் தீவிரமாக ஈடுபட்டு வருகின்றனர்.

கோர்ட்டு உத்தரவு

தர்மபுரி மாவட்டம் மாரண்டஅள்ளி அருகே காளிகவுண்டன் கொட்டாய் பகுதியில் மின்வேலியில் சிக்கி 2 பெண் யானை மற்றும் ஒரு மக்னா யானை உயிரிழந்தன. இதனால் 2 குட்டி யானைகள் தாயை இழந்து சுற்றிவந்தன. இந்த 2 குட்டி யானைகளும் வனப்பகுதிக்குள் யானைகள் கூட்டத்துடன் இணைந்ததா?, அவற்றின் நிலை என்ன என்பது தெரியவில்லை.

இதனிடையே தாயை இழந்த குட்டி யானைகள் கூட்டத்துடன் உள்ளதா? இல்லை தனியாக இருக்கிறதா? என கண்காணித்து அவற்றின் புகைப்படத்தை நீதிமன்றத்தில் சமர்பிக்க வேண்டும் என கோர்ட்டு உத்தரவிட்டது. இதையடுத்து தேன்கனிக்கோட்டை வனத்துறையினர் மற்றும் வேட்டை தடுப்பு காவலர்கள் அடங்கிய குழுவினர் பாலக்கோடு வனத்துறையினருடன் இணைந்து மாரண்டஅள்ளி காப்புக்காடுகள் மற்றும் காளிகட்டா வனப்பகுதியில் குட்டி யானைகளை தேடி வருகின்றனர்.

தேடும் பணி தீவிரம்

கடந்த சில நாட்களாக இந்த பணியில் வனத்துறையினர் தீவிரமாக ஈடுபட்டு வருகின்றனர். குட்டி யானைகளை புகைப்படம் எடுத்து அவற்றை கோர்ட்டில் தெரிவிக்க வேண்டி உள்ளதால் தேடுதல் வேட்டையை வனத்துறையினர் தீவிரப்படுத்தி உள்ளனர். இதனிடையே காளிகட்டா வனப்பகுதியில் தேன்கனிக்கோட்டை வனச்சரகர் முருகேசன் தலைமையிலான குழுவினர் குட்டி யானைகளை தீவிரமாக தேடும் பணியில் ஈடுபட்டனர்.