விபத்தில் பலியான மாணவியின் உடலை பிரேத பரிசோதனை செய்ய தாமதம்

பல்லடம்:

விபத்தில் பலியான மாணவியின் உடலை பிரேத பரிசோதனை செய்ய தாமதம் ஆனதால் உறவினர்கள் பல்லடம் அரசு ஆஸ்பத்திரியை முற்றுகையிட்டனர்.

மாணவி சாவு

பல்லடம் அருகே உள்ள வேலப்பகவுண்டம்பாளையத்தை சேர்ந்தவர் கார்த்திகேயன். இவருடைய மனைவி கலைவாணி. இவர்களுடைய மகள் தர்சனா (வயது 10). 4-ம் வகுப்பு படித்து வந்தாள். இந்த நிலையில் சென்னையில் உள்ள உறவினர் வீட்டிற்கு கார்த்திகேயன் தனது மனைவி மற்றும் மகளுடன் காரில் கடந்த 21-ந் தேதி சென்றார்.

இவர்களுடைய கார் பெரம்பலூர் அருகே சென்றபோது விபத்து ஏற்பட்டதாக கூறப்படுகிறது. இதில் தர்சனாவுக்கு தலையில் காயம் ஏற்பட்டுள்ளது. உடனே தர்சனாவை அங்குள்ள தனியார் மருத்துவமனையில் சேர்த்தனர்.

பின்னர் மேல் சிகிச்சைக்காக மாணவியை அங்கிருந்து கோவையில் உள்ள தனியார் மருத்துவமனையில் சேர்க்க ஆம்புலன்சில் அழைத்து வந்தனர். இந்தநிலையில் நேற்றுமுன்தினம் பல்லடம் அருகே வரும் போது மாணவிக்கு மூச்சுத்திணறல் ஏற்பட்டது. இதையடுத்து சிறுமியை பல்லடம் அரசு மருத்துவமனைக்கு கொண்டு சென்றனர். அங்கு மாணவியை பரிசோதித்த டாக்டர்கள் மாணவி ஏற்கனவே இறந்து விட்டதாக தெரிவித்தனர்.

முற்றுகை

இந்த நிலையில் மாணவியின் உடலை பிரேத பரிசோதனை செய்ய உரிய ஆவணங்களை சமர்ப்பிக்குமாறு அரசு மருத்துவமனை நிர்வாகம் கூறியுள்ளது. இதனையடுத்து மாணவியின் பெற்றோர் பெரம்பலூர் சென்று ஆவணங்களை கொண்டு வந்து நேற்றுமாலை சமர்ப்பித்துள்ளனர். இதற்கு மருத்துவமனை நிர்வாகத்தினர் வேலை நேரம் முடிந்து விட்டது. மேலும் பல்லடம் அரசு மருத்துவமனையில் போதிய வசதிகள் இல்லை நாளை (இன்று) காலை தான் பிரேத பரிசோதனை செய்ய முடியும் என தெரிவித்துள்ளனர்.

இதனால் ஆத்திரமடைந்த மாணவியின் பெற்றோர் மற்றும் உறவினர்கள் அரசு மருத்துவமனையை முற்றுகையிட்டு போராட்டத்தில் ஈடுபட முயன்றனர். இதுபற்றி தகவலறிந்து சம்பவ இடத்திற்கு வந்த பல்லடம் போலீசார், அவர்களை சமாதானப்படுத்தி மாணவியின் உடலை திருப்பூர் அரசு மருத்துவமனைக்கு அனுப்பி வைத்து நாளை (இன்று) விரைவாக பரிசோதனை முடித்து தருவதற்கு நடவடிக்கை எடுப்பதாக உறுதி அளித்தனர். இதையடுத்து சமாதானம் அடைந்த சிறுமியின் பெற்றோர் மற்றும் உறவினர்கள் கலைந்து சென்றனர். இந்த சம்பவத்தால் அரசு மருத்துவமனை வளாகத்தில் பரபரப்பு ஏற்பட்டது.