பயனாளிகளுக்கு துரிதமான முறையில் கடனுதவிகளை வங்கிகள் வழங்க வேண்டும்-கலெக்டர்

அரசு செயல்படுத்தும் திட்டங்களில் பயனாளிகளுக்கு வங்கிகள் துரிதமான முறையில் கடனுதவிகளை வழங்க முன் வர வேண்டும் என்று திருவண்ணாமலையில் நடந்த சிறப்பு தொழிற்கடன் வழங்கும் முகாமில் கலெக்டர் முருகேஷ் பேசினார்.

சிறப்பு தொழிற்கடன் முகாம்

திருவண்ணாமலை மாவட்ட கலெக்டர் அலுவலக கூட்டரங்கில் குறு, சிறு மற்றும் நடுத்தரத் தொழில் நிறுவனங்கள் துறை சார்பில் வங்கியாளர் சிறப்பு ஆய்வு கூட்டம் மற்றும் சிறப்பு தொழிற்கடன் வழங்கும் முகாம் நேற்று நடைபெற்றது.

முகாமிற்கு மாவட்ட கலெக்டர் முருகேஷ் தலைமை தாங்கி பேசியதாவது:-

அரசு செயல்படுத்தும் திட்டங்களுக்கு வங்கிகள் சிறப்பான முறையிலும், துரிதமான முறையிலும் கடனுதவிகளை வழங்க முன் வர வேண்டும். தாட்கோ கடன், மகளிர் குழு கடன், பட்டுப்புழு வளர்ப்பு கடன், கைத்தறிக்கடன், வேளாண்மை விற்பனைத் துறை, வேளாண்மை துறை சார்பில் வழங்கப்படும் கிசான் அட்டை உள்ளிட்ட பல்வேறு அரசு துறைகள் மூலம் செயல்படுத்தப்படும் மானியத் திட்டங்கள் பயனாளிகளுக்கு விரைந்து கிடைத்திட வேண்டும்.

மேலும் அரசு மானியத்துடன் கூடிய கடன் விண்ணப்பங்களுக்கு 30 நாட்களுக்கு மேல் வங்கிகள் நிலுவையில் வைத்திருக்க கூடாது. களப்பணியாளர்கள் வங்கியாளரை தொடர்பு கொண்டு தங்கள் பணியினை உரிய முறையில் விரைந்து முடிக்க வேண்டும்.

இவ்வாறு அவர் பேசினார்.

ரூ.2½ கோடியில் கடனுதவி

தொடர்ந்து வேலை வாய்ப்பு உருவாக்கும் திட்டத்தின் கீழ் 8 இளைஞர்களுக்கு ரூ.51 லட்சத்து 23 ஆயிரம் கூடிய மானியத்துடன் கடனுதவி, பிரதம மந்திரி உணவு பதப்படுத்தும் குறு நிறுவனங்களை முறைப்படுத்தும் திட்டத்தின் கீழ் 2 பயனாளிகளுக்கு ரூ.20 லட்சத்து 81 ஆயிரம் மானியத்துடன் கூடிய கடனுதவி, அண்ணல் அம்பேத்கர் தொழில் முன்னோடிகள் திட்டத்தின் கீழ் 4 பயனாளிகளுக்கு ரூ.65 லட்சத்து 82 ஆயிரம் மானியத்துடன் கூடிய கடனுதவிகளை கலெக்டர் முருகேஷ் வழங்கினார்.

மேலும் பிரதான் மந்திரி வேலை வாய்ப்பு உருவாக்கும் திட்டத்தின் கீழ் 3 பயனாளிகளுக்கு ரூ.5 லட்சம் மானியத்துடன் கூடிய கடனுதவி, புதிய தொழில் முனைவோர் மற்றும் தொழில் நிறுவன மேம்பாடு திட்டத்தின் கீழ் 3 பயனாளிகளுக்கு ரூ.98 லட்சத்து 58 ஆயிரம் மானியத்துடன் கூடிய கடனுதவி என மொத்தம் 20 பயனாளிகளுக்கு ரூ.2 கோடியே 61 லட்சத்து 44 ஆயிரம் மதிப்பில் கடனுதவிகளை கலெக்டர் வழங்கினார்.

நிகழ்ச்சியில் மாவட்ட தொழில் மைய பொது மேலாளர் ரவி, மகளிர் திட்டம் திட்ட இயக்குனர் சையத் சுலைமான், மாவட்ட பிற்படுத்தப்பட்டோர் மற்றும் சிறுபான்மையினர் நல அலுவலர் சிவா, தாட்கோ மேலாளர் ஏழுமலை, மாவட்ட முன்னோடி வங்கி மேலாளர் கவுரி மற்றும் துறை அலுவலர்கள் கலந்து கொண்டனர்.