தேனீ வளர்ப்பால் கிராமப்புறங்களில் வேலை வாய்ப்பு அதிகரிக்கும்

தேனீ வளர்ப்பால் கிராமப்புறங்களில் வேலை வாய்ப்பு அதிகரிக்கும் என்று கலெக்டர் ஜானி டாம் வர்கீஸ் பேசினார்.

தேனீ வளர்ப்பு பயிற்சி

நாகையில் உள்ள மாவட்ட ஊரக சுய வேலைவாய்ப்பு பயிற்சி நிறுவனத்தில் இலவச தேனீ வளர்ப்பு பயிற்சி வகுப்பு தொடக்க நிகழ்ச்சி நடந்தது. நிகழ்ச்சிக்கு ஊரக சுய வேலைவாய்ப்பு பயிற்சி நிறுவன இயக்குனர் நடராஜன் தலைமை தாங்கினார். மாவட்ட முன்னோடி வங்கி மேலாளர் செந்தில்குமார் முன்னிலை வகித்தார்.

இலவச தேனீ வளர்ப்பு பயிற்சி வகுப்பை கலெக்டர் ஜானி டாம் வர்கீஸ் தொடங்கி வைத்து பேசும் போது கூறியதாவது:-

மருத்துவ குணம் வாய்ந்தது

தேன் மருத்துவ குணம் வாய்ந்தது. குடல் சம்பந்தமான வியாதிகள் குணமடையும். உடலுக்கு நன்மை பயக்கும் தேனை பாலுடன் கலந்து சாப்பிட்டால் பசியை தூண்டும். கிராமப்புறங்களில் தேனீ வளர்ப்பு செய்து நல்ல வருவாய் ஈட்டலாம். இந்த இலவச பயிற்சி வகுப்பை பொதுமக்கள் பயன்படுத்திக் கொண்டு தேனீ வளர்ப்பை கற்றுக் கொண்டு பயனடையலாம். இதன் மூலம் கிராமப்புறங்களில் வேலைவாய்ப்பு அதிகரிக்கும்.இவ்வாறு அவர் கூறினார்.

நிகழ்ச்சியில் செய்தி மக்கள் தொடர்பு அலுவலர் செல்வகுமார் உள்பட அரசு அலுவலர்கள் பலர் கலந்து கொண்டனர்.