2 வீடுகளின் பூட்டை உடைத்து நகை, பணம் திருட்டு

பூட்டு வியாபாரி

ராணிப்பேட்டை மாவட்டம் அரக்கோணத்தை அடுத்த அன்வர்த்திகான்பேட்டை சின்னத் தெருவை சேர்ந்தவர் சிவக்குமாரி (வயது 61). பூட்டு வியாபாரம் செய்து வருகிறார். இவர் நேற்று முன்தினம் தனது வீட்டை பூட்டிக்கொண்டு சென்னையில் நடந்த உறவினர் வீட்டு நிகழ்ச்சிக்கு சென்றுள்ளார். இந்த நிலையில் நேற்று காலை அவரது வீட்டின் பூட்டு உடைக்கப்பட்டு இருப்பதை பார்த்த அக்கம்பக்கத்தினர் இது குறித்து சிவகுமாரிக்கு தகவல் தெரிவித்தனர்.

அதிர்ச்சியடைந்த அவர் வீட்டிற்கு வந்து பார்த்தபோது வீட்டில் இருந்த பொருட்கள் சிதறி கிடந்தது. பீரோவில் வைத்திருந்த 4½ பவுன் நகை திருட்டு போயிருந்தது. இதுபற்றி தகவல் அறிந்து வந்த அரக்கோணம் தாலுகா போலீஸ் இன்ஸ்பெக்டர் பழனிவேல் விசாரணை மேற்கொண்டார். அப்போது மற்றொரு இடத்தில். ரூ.23,000 பையில் மறைத்து வைத்திருந்ததை மர்ம நபர்கள் விட்டு சென்றது தெரிய வந்தது.

மற்றொரு சம்பவம்

அதே ஊரில் பெரிய தெருவை சேர்ந்தவர் ஜெயந்தி (65). இவர் கடந்த வாரம் தனது வீட்டை பூட்டிக் கொண்டு குடும்பத்துடன் சென்னையில் உள்ள உறவினர் வீட்டுக்கு சென்றார். அவரது வீட்டின் பின்பக்க கதவு நேற்று காலை உடைக்கப்பட்டு திறந்து கிடந்தது. தகவலறிந்த ஜெயந்தி வீட்டிற்கு வந்து பார்த்தபோது பீரோவில் வைத்திருந்த வெள்ளி பொருட்கள் மற்றும் பணத்தை மர்ம நபர்கள் திருடிச்சென்றது தெரிய வந்தது.

இது குறித்து அரக்கோணம் தாலுகா போலீஸ் இன்ஸ்பெக்டர் பழனிவேல் தலையிலான போலீசார் விசாரணை நடத்தி வருகின்றனர்.