இறைச்சி கடை தொழிலாளி வெட்டிக்கொலை

தூத்துக்குடியில் கோழி இறைச்சி கடை தொழிலாளி வெட்டிக்கொலை செய்யப்பட்டார். அவருடைய மகனுக்கும் அரிவாள் வெட்டு விழுந்தது. இதுெதாடர்பாக வாலிபரை பிடித்து போலீசார் விசாரணை நடத்தி வருகின்றனர்.

இந்த பயங்கர சம்பவம் பற்றி போலீஸ் தரப்பில் கூறப்பட்டதாவது:-

இறைச்சி கடை தொழிலாளி

தூத்துக்குடி 3 செண்ட் பகுதியை சேர்ந்தவர் மாரிமுத்து (வயது 41). இவர் அழகேசபுரத்தில் உள்ள ஒரு கோழி இறைச்சி கடையில் வேலை செய்து வந்தார்.

இவருடைய மனைவி ராதா. இவர்களது 14 வயது மகன் 9-ம் வகுப்பு படித்து வருகிறார். மேலும் 2 மகள்களும் உள்ளனர்.

சுவரொட்டி கிழிப்பு

கடந்த சில நாட்களுக்கு முன்பு அந்த பகுதியை சேர்ந்த சண்முகவேல் மகன் முகேஷ் (24) என்பவர் அங்கு ஒரு நிகழ்ச்சி தொடர்பாக சுவரொட்டி அடித்து ஒட்டியதாகவும், அது கிழிக்கப்பட்டு இருந்ததாகவும் கூறப்படுகிறது.

இதனால் முகேசின் தந்தை தென்பாகம் போலீசில் புகார் அளித்தார். இதுதொடர்பாக தென்பாகம் போலீசார், மாரிமுத்துவின் மகனை அழைத்து எச்சரிக்கை செய்து அனுப்பி உள்ளனர். இதில் அவர்களுக்கு இடையே முன்விரோதம் ஏற்பட்டுள்ளது.

வெட்டிக்கொலை

நேற்று மாலை 3 செண்ட் பகுதியில் மாரிமுத்து, அவருடைய மகன் ஆகியோர் நின்று கொண்டு இருந்தனர். அங்கு முகேஷ் தனது நண்பர்களுடன் வந்தார். அப்போது அவர்களுக்கு இடையே வாக்குவாதம் ஏற்பட்டுள்ளது.

இதில் ஆத்திரம் அடைந்த முகேஷ் மற்றும் அவரது நண்பர்கள் சேர்ந்து மாரிமுத்துவின் மகனை அரிவாளால் வெட்டினர். இதனை தடுக்க வந்த மாரிமுத்துவுக்கும் சரமாரி அரிவாள் வெட்டு விழுந்தது. இதில் மாரிமுத்து சம்பவ இடத்திலேயே பரிதாபமாக இறந்தார்.

தீவிர சிகிச்சை

இந்த மோதலின்போது முகேஷ் தரப்பை சேர்ந்த முத்துப்பாண்டி என்பவருக்கும் வெட்டு விழுந்துள்ளது. இதனை தொடர்ந்து அவர்கள் அங்கிருந்து தப்பி சென்று விட்டனர்.

இதுகுறித்து தகவல் அறிந்த தூத்துக்குடி நகர துணை போலீஸ் சூப்பிரண்டு சத்தியராஜ், தென்பாகம் போலீஸ் இன்ஸ்பெக்டர் ராஜாராமன், சப்-இன்ஸ்பெக்டர் கங்கைநாத பாண்டியன் மற்றும் போலீசார் சம்பவ இடத்துக்கு சென்று மாரிமுத்துவின் மகனை மீட்டு சிகிச்சைக்காக தூத்துக்குடி அரசு ஆஸ்பத்திரியில் சேர்த்தனர். அங்கு அவருக்கு தீவிர சிகிச்சை அளிக்கப்பட்டு வருகிறது.

பரபரப்பு

மாரிமுத்து உடலை மீட்டு பிரேத பரிசோதனைக்காக அரசு ஆஸ்பத்திரிக்கு அனுப்பி வைத்தனர்.

இதுதொடர்பாக தென்பாகம் போலீசார் வழக்குப்பதிவு செய்து, முகேசை பிடித்து விசாரணை நடத்தி வருகின்றனர். மேலும் 4 பேரை தேடி வருகின்றனர். இந்த சம்பவம் தூத்துக்குடியில் பரபரப்பை ஏற்படுத்தி உள்ளது.