திறன்மிகு விளையாட்டு வீரர்களுக்கு சிறப்பு உதவி தொகை 15-ந் தேதிக்குள் பெற விண்ணப்பிக்கலாம்

திறன்மிகு விளையாட்டு வீரர்கள் திட்டங்களில் சிறப்பு உதவி தொகை பெற 15-ந் தேதிக்குள் விண்ணப்பிக்கலாம் என அறிவிக்கப்பட்டுள்ளது.

திருவண்ணாமலை மாவட்ட கலெக்டர் முருகேஷ் வெளியளிட்டுள்ள செய்திக்குறிப்பில் கூறியிருப்பதாவது:-

தமிழ்நாடு விளையாட்டு மேம்பாட்டு ஆணையத்தால் திறன்மிகு விளையாட்டு வீரர்களுக்கான சிறப்பு உதவி தொகை வழங்கும் திட்டம் 3 வகைகளில் செயல்படுத்தப்பட்டு வருகிறது.

இதில் உதவித்தொகை பெற விரும்பும் விண்ணப்பதாரர்கள் தேசிய அளவிலான போட்டிகளில் தமிழ்நாட்டின் சார்பில் பங்கு பெற்று பதக்கங்கள் வென்றிருக்க வேண்டும். தலைசிறந்த விளையாட்டு வீரர்களுக்கு ரூ.25 லட்சம் வரையிலான சிறப்பு உதவி தொகை 5 பேருக்கும், பன்னாட்டு அளவிலான போட்டிகளில் பதக்கம் வெல்வதற்கு ஊக்குவிக்கும் திட்டத்தின் மூலம் ரூ.10 லட்சம் வரையிலான உதவி தொகை 5 மாற்றுத் திறனாளிகள் உள்பட 50 பேருக்கும், வெற்றியாளர்கள் மேம்பாட்டு திட்டத்தின் மூலம் ரூ.2 லட்சம் வரையிலான உதவி தொகை 10 மாற்றுத் திறனாளிகள் உட்பட 100 பேருக்கு மிகாமலும் வழங்கப்பட உள்ளது. இதற்கு தமிழ்நாடு விளையாட்டு மேம்பாட்டு ஆணையத்தின் இணையதளம் www.sdat.tn.gov.in மூலம் வீரர், வீராங்கனைகள் தங்களது விண்ணப்பங்களை வருகிற 15-ம் தேதி மாலை 5 மணி வரை சமர்ப்பிக்கலாம். மேலும் விவரங்களுக்கு ஆடுகளம் தகவல் மையத்தினை அனைத்து வேலை நாட்களிலும் காலை 10 மணி முதல் மாலை 5 மணி வரை தொடர்பு கொள்ளலாம். இவ்வாறு அதில் தெரிவிக்கப்பட்டுள்ளது.