அரசு பஸ்-கார் மோதல்; 2 பேர் படுகாயம்

கர்நாடக மாநிலம் பெங்களூருவில் இருந்து மதுரை மாவட்டம் மேலூர் நோக்கி கார் ஒன்று சென்று கொண்டிருந்தது. காரை மதுசூதனராவ் (வயது 45) என்பவர் ஓட்டினார். ரவி என்பவர் உடன் வந்தார். அந்த கார் நேற்று காலை வேடசந்தூர் அருகே திண்டுக்கல்-கரூர் சாலையில் வந்து கொண்டிருந்தது.

அப்போது எதிரே மதுரையில் இருந்து சேலம் நோக்கி சென்ற அரசு பஸ் எதிர்பாராதவிதமாக கார் மீது மோதியது. இதில் காரின் முன்பகுதி அப்பளம் போல் நொறுங்கியது. இதில் காரில் வந்த மதுசூதனராவ், ரவி ஆகியோர் படுகாயம் அடைந்தனர். இதையடுத்து அவர்களை அக்கம்பக்கத்தினர் மீட்டு சிகிச்சைக்காக வேடசந்தூர் அரசு மருத்துவமனைக்கு அனுப்பி வைத்தனர்.

அங்கு அவர்களுக்கு தீவிர சிகிச்சை அளிக்கப்பட்டு வருகிறது. இதுகுறித்து கூம்பூர் போலீசார் வழக்குப்பதிவு செய்து விசாரணை நடத்தி வருகின்றனர்.