மோட்டார் சைக்கிள் மீது கார் மோதல்; பூ வியாபாரி பலி

கீரனூர்:

புதுக்கோட்டை மாவட்டம், கீழக்குறிச்சியை சேர்ந்தவர் பரமசிவம் (வயது 34). இவர், கீரனூரில் பூக்கடை நடத்தி வந்தார். நேற்று முன்தினம் மாலை இவரது மனைவி ராதிகாவுடன் (32) மோட்டார் சைக்கிளில் திருச்சி சாலையில் சென்று கொண்டிருந்தார். அப்போது சாலையை கடக்க முயன்றபோது திருச்சியில் இருந்து வந்த கார் எதிர்பாராதவிதமாக மோட்டார் சைக்கிள் மீது மோதியது. இதில் கணவன்-மனைவி இருவரும் படுகாயமடைந்தனர். இதைப்பார்த்த அருகில் இருந்தவர்கள் அவர்களை மீட்டு சிகிச்சைக்காக திருச்சி அரசு மருத்துவமனைக்கு அனுப்பி வைத்தனர். அங்கு சிகிச்சை பலனின்றி பரமசிவம் பரிதாபமாக இறந்தார். ராதிகா சிகிச்சை பெற்று வருகிறார். இதுகுறித்து கீரனூர் போலீசார் வழக்குப்பதிவு செய்து, கார் டிரைவர் ஏம்பலை சேர்ந்த முத்தையா மீது வழக்குப்பதிவு செய்து விசாரணை நடத்தி வருகின்றனர்.