மோட்டார் சைக்கிள் மீது சரக்கு ஆட்டோ மோதி கணவன்-மனைவி பலி

சரக்கு ஆட்டோ மோதல்

ராணிப்பேட்டை மாவட்டம் அரக்கோணத்தை அடுத்த மேடல் காந்திநகர் பகுதியை சேர்ந்தவர் தீனதயாளன் (வயது 37). கட்டிட மேஸ்திரி. இவரது மனைவி ரூபாவதி (30). இந்த தம்பதியினர்களுக்கு இரண்டு மகள், ஒரு மகன் உள்ளனர். தீனதயாளன் நேற்று மாலை அவரது மனைவி ரூபாவதியுடன் வேடல் காந்திநகரில் இருந்து மோட்டார் சைக்கிளில் அரக்கோணம் நோக்கி வந்து கொண்டிருந்தார்.

அப்போது சோளிங்கரில் இருந்து அரக்கோணம் நோக்கி வந்த சரக்கு ஆட்டோ முன்னால் சென்று கொண்டிருந்த தீனதயாளனின் மோட்டார் சைக்கிள் மீது மோதியது. இதில் தீனதயாளன் மற்றும் அவரது மனைவி ரூபாவதி ஆகிய இருவரும் தூக்கி வீசப்பட்டு படுகாயம் அடைந்தனர்.

கணவன், மனைவி பலி

இதில் கணவன், மனைவி இருவரும் சம்பவ இடத்திலேயே பரிதாபமாக உயிரிழந்தனர். இது குறித்து தகவல் அறிந்து வந்த அரக்கோணம் தாலுகா போலீசார், இருவரின் உடல்களை மீட்டு பிரேத பரிசோதனைக்காக அரக்கோணம் அரசு மருத்துவமனைக்கு அனுப்பி வைத்தனர்.

மேலும் இதுகுறித்து வழக்குப் பதிவு செய்து விபத்து ஏற்படுத்திய சரக்கு ஆட்டோ டிரைவர் சோளிங்கரை சேர்ந்த முகமது சலீம் (22) என்பவரை கைது செய்து விசாரித்து வருகின்றனர்.