ஆங்கில புத்தாண்டு பிறப்பையொட்டி தேவாலயங்களில் நள்ளிரவு சிறப்பு பிரார்த்தனை-திரளான கிறிஸ்தவர்கள் பங்கேற்பு

தர்மபுரி:

ஆங்கில புத்தாண்டு பிறப்பையொட்டி தர்மபுரி மாவட்டத்தில் உள்ள அனைத்து தேவாலயங்களிலும் நள்ளிரவு சிறப்பு பிரார்த்தனை நடைபெற்றது. இதில் கிறிஸ்தவர்கள் திரளாக கலந்து கொண்டனர்.

புத்தாண்டு பிறப்பு

ஆங்கில புத்தாண்டு பிறப்பையொட்டி தர்மபுரி மாவட்டத்தில் உள்ள தேவாலயங்களில் நேற்று முன்தினம் நள்ளிரவு சிறப்பு பிரார்த்தனைகள் நடைபெற்றது. இதில் அந்தந்த பகுதியை சேர்ந்த கிறிஸ்தவர்கள் திரளாக கலந்து கொண்டனர். தொடர்ந்து தேவாலயங்களில் பங்குத்தந்தைகள் மற்றும் ஆயர்கள் பிரார்த்தனையில் கலந்து கொண்டவர்களுக்கு ஆசி வழங்கினர். இந்த பிரார்த்தனைகள் முடிந்த பின்னர் ஒருவருக்கொருவர் கேக் மற்றும் இனிப்புகள் வழங்கி புத்தாண்டு வாழ்த்துக்களை பரிமாறி கொண்டனர்.

தர்மபுரி பாரதிபுரத்தில் அன்னசாகரம் செல்லும் சாலையில் புதிதாக கட்டப்பட்டு வரும் தூய இருதய ஆண்டவர் பேராலய வளாகத்தில் நேற்று முன்தினம் நள்ளிரவு, புத்தாண்டு பிறப்பையொட்டி சிறப்பு பிரார்த்தனை நடைபெற்றது. பங்குத்தந்தை அருள்ராஜ் தலைமையில் உதவி பங்குத்தந்தை லிபின் பாஸ்கர், பங்கு தந்தைகள் பிரபாகரன், இயேசுராஜ் ஆகியோர் முன்னிலையில் நடைபெற்ற இந்த சிறப்பு பிரார்த்தனையில் ஏராளமான கிறிஸ்தவர்கள் கலந்து கொண்டனர். பிரார்த்தனை முடிந்த பிறகு ஒருவருக்கொருவர் புத்தாண்டு வாழ்த்துக்களை பரிமாறி கொண்டனர்.

சி.எஸ்.ஐ. சீயோன் ஆலயம்

தர்மபுரி சி.எஸ்.ஐ. சீயோன் தேவாலயத்தில் புத்தாண்டு பிறப்பையொட்டி சிறப்பு பிரார்த்தனை நடைபெற்றது. ஆயர் பிரான்சிஸ் பெர்னாட்ஷா தலைமையில் நடைபெற்ற இந்த சிறப்பு பிரார்த்தனையில் ஏராளமான கிறிஸ்தவர்கள் கலந்து கொண்டனர். இதேபோல் வேப்பமரத்து கொட்டாயில் உள்ள ஏ.ஜி. தேவாலயத்தில் பாதிரியார் சுந்தர் சிங் தலைமையில் சிறப்பு பிரார்த்தனை நடைபெற்றது. இதில் அந்த பகுதியை சேர்ந்த ஏராளமான கிறிஸ்தவர்கள் கலந்து கொண்டனர்.

இதேபோன்று கோவிலூரில் உள்ள தேவாலயத்தில் பங்குத்தந்தை ஏசுதாஸ் தலைமையில் புத்தாண்டு பிறப்பு சிறப்பு பிரார்த்தனை நடைபெற்றது. செல்லியப்பட்டியில் பங்குத்தந்தை மதலைமுத்து தலைமையிலும், கடகத்தூரில் பங்குத்தந்தை சவுரியப்பன் தலைமையிலும், பாலக்கோட்டில் பங்குத்தந்தை கென்னடி தலைமையிலும் சிறப்பு பிரார்த்தனை நடைபெற்றது.

பட்டாசு வெடித்து உற்சாகம்

பூலாப்பட்டியில் பங்குத்தந்தை புஷ்பராஜ் தலைமையிலும், பி.பள்ளிப்பட்டியில் பங்குத்தந்தை தேவசகாயம் தலைமையிலும், பொம்மிடியில் பங்குத்தந்தை ஆரோக்கிய கென்னடி தலைமையிலும், தென்கரைக்கோட்டையில் பங்குத்தந்தை வினோத் தலைமையிலும் புத்தாண்டு பிறப்பு சிறப்பு பிரார்த்தனைகள் நடைபெற்றன. கொட்டும் பனியையும் பொருட்படுத்தாமல் ஏராளமான கிறிஸ்தவர்கள் இதில் கலந்து கொண்டனர்.

புத்தாண்டு பிறப்பை வரவேற்கும் வகையில் தர்மபுரி நகரம் மற்றும் மாவட்டம் முழுவதும் உள்ள பல்வேறு பகுதிகளில் நேற்று முன்தினம் நள்ளிரவு பொதுமக்கள் பட்டாசு வெடித்தும், மத்தாப்புக்கள் கொளுத்தியும் தங்களது மகிழ்ச்சியை வெளிப்படுத்தினர்.