3½ டன் வேளாண் விளைபொருட்கள் ஏலம்

முத்தூர் ஒழுங்குமுறை விற்பனை கூடத்தில் 3 ½ வேளாண் விளைபொருட்கள் ஏலம் விடப்பட்டது.

ஒழுங்குமுறை விற்பனை கூடம்

திருப்பூர் மாவட்டம் முத்தூர் ஒழுங்குமுறை விற்பனை கூடத்தில் வாரந்தோறும் சனிக்கிழமை தேங்காய், தேங்காய் பருப்பு, எள் ஆகிய வேளாண் விளை பொருள்களின் ஏலம் நடைபெற்று வருகிறது. இந்த ஏலங்களில் முத்தூர் நகர மற்றும் சுற்றுவட்டார கிராம பகுதி விவசாயிகள் மற்றும் ஈரோடு மாவட்டம் கொல்லன்கோவில், சிவகிரி பேரூராட்சி பகுதிகள், அஞ்சூர் ஊராட்சி மற்றும் கரூர் மாவட்டம் அஞ்சூர், கார்வழி ஊராட்சி பகுதிகளை சேர்ந்த விவசாயிகள் கலந்து கொண்டு வேளாண் விளை பொருட்களை விற்று பலனடைந்து வருகின்றனர்.

இதன்படி நேற்று காலை ஒழுங்குமுறை விற்பனை கூடத்திற்கு சுற்றுவட்டார விவசாயிகள் 5 ஆயிரத்து 184 தேங்காய்களை ஏலத்திற்கு கொண்டு வந்திருந்தனர். இதைத்தொடர்ந்து டெண்டர் முறையில் ஏலம் நடைபெற்றது. இதில் ஒரு கிலோ தேங்காய் அதிகபட்ச விலையாக ரூ.24.60-க்கும், குறைந்தபட்ச விலையாக ரூ.20.20-க்கும் ஏலம் விடப்பட்டது.

தேங்காய் பருப்பு ஏலம்

மேலும் 49 தேங்காய் பருப்பு மூட்டைகள் ஏலம் விடப்பட்டதில் ஒரு கிலோ தேங்காய் பருப்பு அதிகபட்ச விலையாக ரூ.76.60-க்கும், குறைந்தபட்ச விலையாக ரூ.57.60-க்கும் டெண்டர் முறையில் ஏலம் விடப்பட்டது. ஒழுங்குமுறை விற்பனை கூடத்தில் கடந்த வாரத்தை விட இந்த வாரம் 1040 தேங்காய்களும், 15 தேங்காய் பருப்பு மூட்டைகளும் குறைவாக கொண்டு வரப்பட்டு ஏலம் விடப்பட்டது. இதில் தேங்காய் ஒரு கிலோவிற்கு 85 பைசாவும், தேங்காய் பருப்பு ஒரு கிலோவிற்கு 75 பைசாவும் கூடுதலாக விவசாயிகளுக்கு கிடைத்தது. மேலும் கடந்த 8 வாரங்களாக வரத்து இல்லாததால் எள் ஏலம் நடைபெறவில்லை. கடந்த 9 மாதங்களுக்கு முன்பு தேங்காய் பருப்பு விலை கிலோ ரூ.90-ஐ கடந்து ஏலம் விடப்பட்டு வந்த நிலையில் தற்போது வரை ரூ.90-க்கும் கீழே விலை சரிந்து ஏலம் விடப்பட்டு வருகிறது என்பது குறிப்பிடத்தக்கது.

3½ டன் ஏலம்

மேலும் ஒழுங்குமுறை விற்பனை கூடத்தில் தேங்காய், தேங்காய் பருப்பு, எள் மூட்டைகள் 3½ டன் அளவில் மொத்தம் ரூ‌.1 லட்சத்து 41 ஆயிரத்து 724-க்கு வேளாண் விளை பொருள்கள் ஏலம் விடப்பட்டது. திருப்பூர், ஈரோடு‍, கோவை மாவட்டங்களில் மழை பெய்து வருவதால் விவசாயிகள் தேங்காயை உடைத்து வெயிலில் நன்கு காய வைக்க முடியவில்லை.

தொடர் மழை காரணமாக ஒழுங்குமுறை விற்பனை கூடத்திற்கு கடந்த 5 வார காலமாக தேங்காய் பருப்பு குறைவாக கொண்டுவரப்பட்டு ஏலம் விடப்பட்டு வருகிறது என்பது குறிப்பிடத்தக்கது.

இத்தகவலை முத்தூர் ஒழுங்குமுறை விற்பனைக்கூட மேற்பார்வையாளர் கே.தங்கவேல் தெரிவித்து உள்ளார்.