லாரி மோதி கல்லூரி மாணவன் பலி

அருப்புக்கோட்டை,

அருப்புக்கோட்டை அருகே லாரி மோதி கல்லூரி மாணவன் பலியானார்.

கல்லூரி மாணவன்

நரிக்குடி அருகே உள்ள விடத்தகுளம் கிராமத்தை சேர்ந்தவர் புகழ்ராஜன். இவரது மகன் தினேஷ் (வயது 19). இவர் அருப்புக்கோட்டையில் உள்ள தனியார் கல்லூரியில் 2-ம் ஆண்டு இளங்கலை பட்டம் படித்து வந்தார். இந்தநிலையில் இவர் அருப்புக்கோட்டை அருகே பாளையம்பட்டியில் நடைபெறும் கபடி போட்டியில் விளையாடுவதற்காக நண்பர்களுடன் வந்தார்.

கபடி போட்டியில் விளையாடிவிட்டு மீண்டும் ஊர் திரும்புவதற்காக பாளையம்பட்டி வட்டார போக்குவரத்து அலுவலகம் அருகே நான்கு வழி சாலையில் நண்பர்களுடன் நின்று கொண்டிருந்தார்.

லாரி மோதி பலி

அப்போது நாமக்கல்லில் இருந்து தூத்துக்குடி நோக்கி கியாஸ் ஏற்றி சென்ற டேங்கர் லாரி, தினேஷ் மீது திடீரென மோதியது.

இதில் அவர் தூக்கி வீசப்பட்டு பலத்த காயம் அடைந்தார். உடனே அவரை மீட்டு சிகிச்சைக்காக அருப்புக்கோட்டை அரசு ஆஸ்பத்திரிக்கு கொண்டு சென்றனர். செல்லும் வழியிலேயே அவர் பரிதாபமாக உயிரிழந்தார். இந்த விபத்து குறித்து டவுன் போலீசார் வழக்குப்பதிவு செய்து நாமக்கல்லை சேர்ந்த லாரி டிரைவர் தமிழரசனிடம் விசாரணை நடத்தி வருகின்றனர்.