மோட்டார் சைக்கிள்கள் மோதல்; ஒருவர் பலி

திருச்சி பாலக்கரை கான்மியான் பள்ளிவாசல் தெருவை சேர்ந்தவர் உமர்பாரூக் (வயது 53). இவர் நேற்று மாலை மோட்டார் சைக்கிளில் மேலப்புதூர் சுரங்கப்பாதை வழியாக பாலக்கரை நோக்கி சென்று கொண்டு இருந்தார். அப்போது அவருக்கு பின்னால் வேகமாக வந்த மற்றொரு மோட்டார் சைக்கிள் உமர்பாரூக்கின் மோட்டார் சைக்கிள் மீது மோதியது. இதில் அவர் தூக்கி வீசப்பட்டு தலையில் பலத்த காயம் அடைந்தார். இதனை கண்ட அந்த பகுதியினர் உமர்பாரூக்கை மீட்டு 108 ஆம்புலன்ஸ் மூலம் திருச்சி அரசு மருத்துவமனைக்கு சிகிச்சைக்காக கொண்டு சென்றனர். ஆனால் மருத்துவமனைக்கு செல்லும் வழியில் உமர்பாரூக் பரிதாபமாக இறந்தார். இந்த விபத்து குறித்து வடக்கு போக்குவரத்து புலனாய்வு பிரிவு போலீசார் வழக்குப்பதிவு செய்து விசாரணை நடத்தி வருகிறார்கள்.