புகார் பெட்டி

நாய்கள் தொல்லை

சிவகங்கை மாவட்டம் எஸ்.புதூர் பகுதியில் நாய்கள் சாலையில் அதிக அளவில் சுற்றித்திரிகின்றன. இதனால் பொதுமக்கள் சாலையில் நடக்க, வாகனங்களில் பயணிக்க அச்சப்படுகின்றனர். நாய்களால் சாலை விபத்துகளும் அவ்வப்போது நிகழ்ந்து வருகிறது. எனவே பொதுமக்களுக்கு இடையூறு ஏற்படுத்தும் நாய்களை அப்புறப்படுத்த வேண்டும்,

பொதுமக்கள், எஸ்.புதூர்.

தடுப்பு சுவர் வேண்டும்

சிவகங்கை மாவட்டம் தேவகோட்டை ஒத்தக்கடை அருகே விருச்சுழி ஆற்றுப்பாலத்தின் இருபக்கவாட்டிலும் தடுப்பு சுவர் இன்றி ஆபத்தான நிலையில் உள்ளது. இதனால் சாலையில் வாகனஓட்டிகள் அச்சஉணர்வுடனே பயணிக்கும் நிலை ஏற்பட்டுள்ளது. விபத்து அபாயம் உள்ளதால் சிலர் சாலையை பயன்படுத்துவதை தவிர்த்து வருகின்றனர். எனவே பாலத்தின் இருபுறங்களிலும் தடுப்புசுவர் அமைத்துதர அதிகாரிகள் நடவடிக்கை எடுக்க வேண்டும்.

நெல்சன், தேவகோட்டை.

பயணிகள் அவதி

சிவகங்கை மாவட்டம் திருப்புவனத்தில் இருந்து மதுரை பெரியார் பஸ் நிலையத்திற்கு மதிய நேரத்தில் இயக்கப்படும் பஸ் போதுமானதாக இல்லை. பயணிகள் நீண்ட நேரம் காத்திருந்து பயணிப்பதால் அவதியடைகின்றனர். மேலும் இயக்கப்படும் பஸ்களிலும் கூட்டம் அதிகமாக உள்ளது. எனவே இந்த பாதையில் கூடுதல் பஸ் இயக்க அதிகாரிகள் நடவடிக்கை எடுக்க வேண்டும்.

ராஜாராம், சிவகங்கை.

கருவேல மரங்களின் ஆக்கிரமிப்பு

சிவகங்கை மாவட்ட பகுதியில் ஏராளமான கண்மாய்கள் உள்ளன. இந்த கண்மாய்களே விவசாயிகளின் அடிப்படை நீர் ஆதாரமாக உள்ளது. தற்போது சில கண்மாய்கள் கருவேல மரங்களால் அதிக அளவில் ஆக்கிரமிக்கப்பட்டு உள்ளன. இதனால் கண்மாயில் நீர்வளம் பாதிக்கப்படும் நிலை உள்ளது. எனவே கண்மாயில் உள்ள கருவேல மரங்களை அகற்ற அதிகாரிகள் நடவடிக்கை எடுக்க வேண்டும்.

முத்துராமலிங்கம், சிவகங்கை.

குண்டும், குழியுமான சாலை

சிவகங்கை மாவட்டம் சிங்கம்புணரி மற்றும் அதன் சுற்று வட்டார பகுதிகளில் உள்ள சாலைகள் ஆங்காங்கே பெயர்ந்து குண்டும், குழியுமாக உள்ளது. இவ்வழியாக செல்லும் வாகன ஓட்டிகள் கடும் அவதியடைந்து வருகின்றனர். அடிக்கடி விபத்துகளும் நடக்கிறது. வாகன ஓட்டிகளின் நலன்கருதி சாலையை சீரமைப்பார்களா?

பொதுமக்கள், சிங்கம்புணரி.