பனியன் துணிகளை ஏற்றிச் சென்ற கண்டைனர் லாரி கவிழ்ந்து விபத்து - டிரைவர் காயம்

பாலையம்பட்டி,

திருப்பூரில் இருந்து பனியன் துணிகளை ஏற்றிக்கொண்டு கண்டெய்னர் லாரி ஒன்று தூத்துக்குடி துறைமுகம் நோக்கி சென்று கொண்டிருந்தது. லாரியை சீதாராமன் (வயது 52) என்பவர் ஓட்டி வந்தார்.

தொடர்ந்து நீண்ட நேரம் லாரியை ஓட்டி வந்ததால் டிரைவர் தூக்கக்கலக்கத்தில் இருந்ததாக கூறப்படுகிறது.இந்நிலையில் அருப்புக்கோட்டை புறவழிச்சாலை வழியாக கண்டெய்னர் லாரி சென்று கொண்டிருந்த போது சாய்பாபா கோவில் அருகே திடீரென டிரைவரின் கட்டுப்பாட்டை இழந்த லாரி சாலையின் மைய தடுப்பில் மோதி விபத்துக்கு உள்ளானது.

இந்த விபத்தில் லாரியில் இருந்த கண்டெய்னர் சாலையில் கவிழந்தது.உடனே சுதாரித்துக் கொண்ட டிரைவர் லாரி மேலும் விபத்து ஏற்படாமல் பாத்துக் கொண்டார்.கண்டெய்னர் சாலையில் விழும் போது வேறு வாகனங்கள் அவ்வழியாக வராததால் உயிர் சேதம் எதுவும் ஏற்படவில்லை.

அதிர்ஷ்டவசமாக இந்த விபத்தில் லாரி டிரைவர் லேசான காயங்களுடன் உயிர் தப்பினார்.விபத்து குறித்து தகவல் அறிந்து விரைந்து வந்த போலீசார் கிரேன் உதவியுடன் கவிழ்ந்து கிடந்த கண்டெய்னர் லாரியை அப்புறப்படுத்தனர்.காலை வேளையில் ஏற்பட்ட விபத்தால் சிறிது நேரம் போக்குவரத்து பாதிப்பு ஏற்பட்டது.