மேட்டூரில் மின்சாரம் தாக்கி சமையல் தொழிலாளி பலி

மேட்டூர்,

மேட்டூர் அனல் மின் நிலையம் 4 ரோடு பகுதியில் நடமாடும் ஓட்டல் கடை இயங்கி வருகிறது. இந்த ஓட்டலில் சமையல் தொழிலாளியாக திருப்பத்தூரை சேர்ந்த மாதேஸ்வரன் (வயது 22) என்பவர் வேலை செய்து வந்தார்.

சம்பவத்தன்று இவர் யு.பி.எஸ். பேட்டரிக்கு சார்ஜ் செய்யும் போது, எதிர்பாராதமாக மின்சாரம் தாக்கி மயங்கி விழுந்தார். உடனடியாக அருகே இருந்தவர்கள் மேட்டூர் அரசு ஆஸ்பத்திரிக்கு மாதேஸ்வரனை கொண்டு சென்றனர். அங்கு அவரை டாக்டர்கள் பரிசோதனை செய்ததில் மாதேஸ்வரன் ஏற்கனவே இறந்து விட்டதாக தெரிவித்தனர். இந்த சம்பவம் குறித்து மேட்டூர் போலீசார் விசாரணை நடத்தி வருகிறார்கள்.