ஒரே நாளில் 39,642 பேருக்கு கொரோனா தடுப்பூசி

வேலூர் மாவட்டத்தில் 1,965 இடங்களில் நடந்த சிறப்பு முகாமில் ஒரே நாளில் 39,642 பேருக்கு கொரோனா தடுப்பூசி செலுத்தப்பட்டது என்று சுகாதாரத்துறை அதிகாரிகள் தெரிவித்தனர்.

1,965 இடங்களில் சிறப்பு முகாம்

தமிழகத்தில் கொரோனாவினால் ஏற்படும் உயிரிழப்பை தடுக்கவும், தொற்று பரவலை கட்டுப்படுத்தவும் தமிழக அரசு பல்வேறு முன்எச்சரிக்கை நடவடிக்கைகள் எடுத்து வருகிறது. அதன் ஒரு பகுதியாக தமிழகம் முழுவதும் ஒரே நாளில் ஒரு லட்சம் இடங்களில் கொரோனா தடுப்பூசி சிறப்பு முகாம் நடத்தப்படும் என்று தெரிவிக்கப்பட்டது. அதன்படி சிறப்பு முகாம் நடைபெற்றது.

வேலூர் மாவட்டத்தில் பஸ் நிலையங்கள், மார்க்கெட், பஜார், உழவர்சந்தைகள், பொதுமக்கள் அதிகம் கூடும் இடங்கள் உள்பட 1,965 இடங்களில் சிறப்பு முகாம் நடத்த மாவட்ட நிர்வாகம் சார்பில் ஏற்பாடு செய்யப்பட்டிருந்தது. வேலூர் விருப்பாட்சிபுரத்தில் உள்ள திருமண மகாலில் நடந்த சிறப்பு முகாமை கலெக்டர் குமாரவேல்பாண்டியன் தொடங்கி வைத்து பார்வையிட்டார். அந்த பகுதியில் வசிக்கும் பொதுமக்கள் மற்றும் கடை ஊழியர்கள் தடுப்பூசி செலுத்தி உள்ளார்களா என்று கேட்டறிந்து, அனைவரும் தடுப்பூசி செலுத்த நடவடிக்கை எடுக்கும்படி சுகாதாரத்துறை, மாநகராட்சி அலுவலர்களுக்கு கலெக்டர் அறிவுறுத்தினார்.

முகாமில் சுகாதாரப்பணிகள் துணை இயக்குனர் பானுமதி, வேலூர் மாநகராட்சி மேயர் சுஜாதா, கமிஷனர் அசோக்குமார், மாநகர நலஅலுவலர் (பொறுப்பு) முருகன், சுகாதார அலுவலர் பாலமுருகன் மற்றும் பலர் கலந்து கொண்டனர்.

39,642 பேருக்கு கொரோனா தடுப்பூசி

தடுப்பூசி சிறப்பு முகாம் நேற்று காலை 7 மணி முதல் இரவு 7 மணி வரை நடந்தது. இதில், பொதுமக்கள் பலர் ஆர்வத்துடன் கலந்துகொண்டனர். குறிப்பாக 2-வது தவணை கொரோனா தடுப்பூசி, பூஸ்டர் தடுப்பூசி அதிகம் நபர்கள் போட்டு கொண்டனர். தடுப்பூசி போடும் பணியில் செவிலியர்கள், மருத்துவ பணியாளர்கள் என்று 600-க்கும் மேற்பட்டோர் ஈடுபட்டனர்.

மாவட்டம் முழுவதும் 1,965 இடங்களில் நடந்த சிறப்பு முகாம்களில் ஒரே நாளில் 39,642 பேருக்கு கொரோனா தடுப்பூசி செலுத்தப்பட்டது என்று சுகாதாரத்துறை அதிகாரிகள் தெரிவித்தனர்.

காட்பாடி

காட்பாடி தாலுகாவில் உள்ள 41 கிராமங்கள் மற்றும் காட்பாடியில் உள்ள வேலூர் மாநகராட்சி பகுதியில் கொரோனா தடுப்பூசி முகாம் நடந்தது.