வேலூர் மாவட்டத்தில் இன்று கொரோனா தடுப்பூசி சிறப்பு முகாம்

வேலூர்

தமிழகத்தில் கொரோனா பாதிப்பை கட்டுப்படுத்தவும், தொற்றினால் ஏற்படும் உயிரிழப்பை தடுக்கும் வகையிலும் கொரோனா தடுப்பூசி போடும் பணியை தமிழக அரசு தீவிரப்படுத்தி வருகிறது. அந்த வகையில் கொரோனா தடுப்பூசி சிறப்பு முகாம்கள் நடத்தப்படுகிறது. அதன்படி தமிழகம் முழுவதும் இன்று (ஞாயிற்றுக்கிழமை) ஒரு லட்சம் இடங்களில் தடுப்பூசி சிறப்பு முகாம் நடைபெற உள்ளது.

வேலூர் மாவட்டத்தில் பஸ் நிலையங்கள், உழவர் சந்தைகள், பஜார், ஆட்டோ நிறுத்தம், பள்ளிகள் என்று 1,975 இடங்களில் கொரோனா தடுப்பூசி சிறப்பு முகாம் நடைபெறுகிறது. வேலூர் கஸ்பா மாசிலாமணி பள்ளியில் நடக்கும் சிறப்பு முகாமை கலெக்டர் குமாரவேல் பாண்டியன் தொடங்கி வைக்க உள்ளார்.

சிறப்பு முகாம்கள் குறித்து பொதுமக்களிடையே அந்தந்த உள்ளாட்சி அமைப்பினர் மற்றும் சுகாதாரத்துறையினர் விழிப்புணர்வு ஏற்படுத்தி வருகிறார்கள். கொரோனா தடுப்பூசி போடும் பணியில் 700-க்கும் மேற்பட்ட பணியாளர்கள் ஈடுபட உள்ளனர் என்று சுகாதாரத்துறை அதிகாரிகள் தெரிவித்தனர்.