சேதமடைந்த பயணிகள் நிழலகம்

கூத்தாநல்லூர்;

கூத்தாநல்லூர் அருகே சேதமடைந்த பயணிகள் நிழலகத்தை விரைவில் சீரமைக்க வேண்டும் என்று பயணிகள் கோரிக்கை விடுத்துள்ளது.

பயணிகள் நிழலகம்

கூத்தாநல்லூர் அருகே, திருவாரூர்- மன்னார்குடி சாலையில் வ.உ.சி. காலனி உள்ளது. இங்கு சாலையோரத்தில் அப்பகுதி மக்களின் பயன்பாட்டுக்கு பயணிகள் நிழலகம் கட்டப்பட்டது. இந்த பயணிகள் நிழலகத்தை வ.உ.சி. காலனி, மரக்கடை, லெட்சுமாங்குடி, கோரையாறு மற்றும் அதை சுற்றியுள்ள கிராமங்களை சேர்ந்த மக்கள் மற்றும் திருவாரூர், மன்னார்குடி, கூத்தாநல்லூர், நாகப்பட்டினம் போன்ற ஊர்களிலும் மற்றும் ஏனைய ஊர்களில் உள்ள பள்ளி கல்லூரிகளில் படிக்கும் மாணவ- மாணவிகள் பயன்படுத்தி வருகின்றனர்.

சீரமைக்க கோரிக்கை

கடந்த சில ஆண்டுகளாக இந்த பயணிகள் நிழலகம் சேதமடைந்து காணப்படுகிறது. கட்டிடத்தின் மேல் பகுதியில் உள்ள கூரையிலும், உள் பகுதியிலும் சிமெண்டு காரைகள் பெயர்ந்து விழுந்து, கான்கீரிட் கம்பிகள் வெளியில் தெரியும் அளவுக்கு சேதமடைந்து உள்ளன. இதனால், மேற்கூரை பலம் இழந்து இடிந்து விழுந்துவிடும் நிலையில் உள்ளது. இதனால் பயணிகள் நிழலகத்தை பயன்படுத்த முடியாத நிலை ஏற்பட்டுள்ளது. எனவே சேதமடைந்த பயணிகள் நிழலகத்தை விரைவில் சீரமைக்க வேண்டும் என்று அப்பகுதி மக்கள் அரசுக்கு கோரிக்கை விடுத்துள்ளனர்.