காவேரிப்பட்டணம் அருகேமோட்டார் சைக்கிள் மீது லாரி மோதி வாலிபர் பலி
காவேரிப்பட்டணம்:
காவேரிப்பட்டணம் அருகே மோட்டார் சைக்கிள் மீது லாரி மோதி வாலிபர் பலியானார். அவருடைய நண்பர்கள் 2 பேர் படுகாயம் அடைந்தனர்.
வாலிபர்கள்
கிருஷ்ணகிரி அருகே மாரிசெட்டிஅள்ளி பக்கமுள்ள பாப்பாத்தி கொட்டாய் கிராமத்தை சேர்ந்தவர் சுப்பிரமணி. இவருடைய மகன் சூர்யா (வயது 19). இவர் மோட்டார் சைக்கிளில் தனது நண்பர்களான வேலம்பட்டி அருகே சந்தியப்பன் கொட்டாய் பகுதியை சேர்ந்த நவீன்குமார் (19), மாரியப்பன் (17) ஆகியோரை அழைத்து கொண்டு தர்மபுரி- கிருஷ்ணகிரி சாலையில் சென்று கொண்டிருந்தார். அப்போது எதிரே வந்த லாரி கண் இமைக்கும் நேரத்தில் மோட்டார் சைக்கிள் மீது மோதியது. இந்த விபத்தில் தூக்கி வீசப்பட்டு பலத்த காயமடைந்த சூர்யா சம்பவ இடத்திலேயே பலியானார்.
விசாரணை
மோட்டார் சைக்கிளில் வந்த நவீன்குமார், மாரியப்பன் ஆகிய 2 பேரும் பலத்த காயமடைந்தனர். அவர்களை அருகில் இருந்தவர்கள் மீட்டு சிகிச்சைக்காக கிருஷ்ணகிரி அரசு ஆஸ்பத்திரிக்கு அனுப்பி வைத்தனர். இதுகுறித்து தகவல் அறிந்து சம்பவ இடத்துக்கு சென்ற காவேரிப்பட்டணம் போலீசார் சூர்யாவின் உடலை கைப்பற்றி பிரேத பரிசோதனைக்காக அரசு ஆஸ்பத்திரிக்கு அனுப்பி வைத்தனர். இந்த விபத்து குறித்து போலீசார் வழக்குப்பதிவு செய்து விசாரணை நடத்தி வருகின்றனர்.