கல்லூரி மாணவர் உள்பட 2 பேர் பலி

மதுரை ஜெய்ஹிந்த்புரம் தேவர் நகரை சேர்ந்த சிக்கந்தர் பாட்ஷா மகன் அப்துல்கலாம் (வயது 20). அதே பகுதியை சேர்ந்தவர் ராஜா முகமது மகன் ரகீம் (23). அவர்கள் 2 பேரும் மோட்டார் சைக்கிளில் பெருங்குடி நோக்கி சென்றனர். அப்போது பெருங்குடி மருதுபாண்டியர் சிலை அருகில் சென்றபோது எதிரே சரக்கு வேன் ஒன்று வேகமாக வந்தது. அந்த வேன் எதிர்பாராத விதமாக மோட்டார் சைக்கிள் மீது மோதியது. இதில் மோட்டார் சைக்கிளில் வந்த 2 பேரும் படுகாயம் அடைந்து சம்பவ இடத்திலேயே பரிதாபமாக இறந்தனர். இந்த சம்பவம் குறித்து டவுன் போக்குவரத்து புலனாய்வு பிரிவு போலீசார் வழக்குப்பதிவு செய்து சரக்கு வேனை ஓட்டி வந்த திண்டுக்கல் மாவட்டம் தேத்தம்பட்டியை சேர்ந்த முருக பாண்டியன் (46) என்பவரை கைது செய்து விசாரித்து வருகின்றனர். மேலும் விபத்தில் இறந்த ரகீம் தனியார் கல்லூரியில் 3-ம் ஆண்டு படித்து வந்ததும், அப்துல்கலாம் கார் ஷோரூமில் பணியாற்றி வந்ததும் தெரியவந்தது.

ராஜபாளையம், குண்டூர் மூர்த்தி ராஜா தெருவை சேர்ந்த சங்கர்ராஜா மகன் அர்ஜூன் (24). சம்பவத்தன்று இவர் பஸ்சில் ஊருக்கு சென்று கொண்டிருந்தார். அப்போது அருப்புக்கோட்டை மெயின் ரோடு, சின்ன உடைப்பு பஸ் நிறுத்தம் அருகே டிரைவர் பஸ்சை நிறுத்திய போது எதிர்பாராதவிதமாக அர்ஜுன் தவறி கீழே விழுந்தார். இதில் அவரது தலையில் படுகாயம் ஏற்பட்டது. உடனே அங்கிருந்தவர்கள் அவரை சிகிச்சைக்காக மதுரை அரசு ஆஸ்பத்திரியில் சேர்த்தனர். அங்கு சிகிச்சை பலன் அளிக்காமல் அர்ஜுன் பரிதாபமாக இறந்தார். இந்த சம்பவம் குறித்து டவுன் போக்குவரத்து புலனாய்வு பிரிவு போலீசார் வழக்குப்பதிவு செய்து கண்டக்டர் சதீஷ்குமார், டிரைவர் வீராசாமி ஆகியோரிடம் விசாரணை நடத்தி வருகின்றனர்.