பள்ளி மாணவன் உள்பட 2 பேர் சாவு

காரிமங்கலம்:

காரிமங்கலம் பகுதியில் வெவ்வேறு விபத்துகளில் பள்ளி மாணவன் உள்பட 2 பேர் இறந்தனர்.

பள்ளி மாணவன்

திருப்பத்தூர் மாவட்டம் வாணியம்பாடி தாலுகா எம்.ஜி. பெருமாபட்டி பகுதியை சேர்ந்தவர் ராமராஜன். இவரது மகன் தர்ஷன்ராஜ் (வயது 12). இவன் அப்பகுதியில் உள்ள பள்ளியில் 6-ம் வகுப்பு படித்து வந்தான். மாணவன் தனது குடும்பத்தினருடன் காரிமங்கலம் அருகே உள்ள சுண்ணாம்பட்டி கிராமத்தில் உறவினர் வீட்டுக்கு வந்து இருந்தான்.

இந்தநிலையில் நேற்று முன்தினம் மாணவன் அப்பகுதியில் உள்ள சாலை ஓரத்தில் நடந்து சென்றான். அப்போது அந்த வழியாக வந்த கார் மாணவன் மீது மோதியது. இந்த விபத்தில் அவன் படுகாயம் அடைந்தான். உடனே அக்கம் பக்கத்தினர் மாணவனை மீட்டு தர்மபுரி அரசு மருத்துவமனைக்கு அனுப்பி வைத்தனர். அங்கு தீவிர சிகிச்சை அளித்தும் பலனின்றி மாணவன் தர்ஷன்ராஜ் பரிதாபமாக இறந்தான்.

விவசாயி சாவு

இதேபோல் காரிமங்கலம் அருகே உள்ள கன்னிப்பட்டி அந்தேரி கொட்டாய் பகுதியை சேர்ந்தவர் மணி (53). விவசாயியான இவர் மோட்டார் சைக்கிளில் மொரப்பூர் மேம்பாலம் பகுதியில் சென்று கொண்டு இருந்தார். அப்போது பின்னால் வந்த வேன், மோட்டார் சைக்கிள் மீது மோதியது. இதில் மணி படுகாயம் அடைந்தார். அக்கம் பக்கத்தினர் அவரை மீட்டு தர்மபுரி அரசு மருத்துவமனைக்கு அனுப்பி வைத்தனர். அங்கு சிகிச்சை பலனின்றி அவர் பரிதாபமாக இறந்தார்.

இந்த 2 விபத்துகள் குறித்தும் காரிமங்கலம் போலீஸ் இன்ஸ்பெக்டர் வெங்கட்ராமன் வழக்குப்பதிவு செய்து விசாரணை நடத்தி வருகிறார்.