பூ வியாபாரி உள்பட 2 பேர் சாவு

கிருஷ்ணகிரி அருகே வெவ்வேறு சாலை விபத்துகளில் பூ வியாபாரி உள்பட 2 பேர் இறந்தனர்.

பூ வியாபாரி

தர்மபுரி மாவட்டம் பாப்பிரெட்டிப்பட்டி அருகே உள்ள பள்ளிப்பட்டியை சேர்ந்தவர் டேவிட் (வயது 34). பூ வியாபாரி. நேற்று முன்தினம் கிருஷ்ணகிரிக்கு வந்த அவர் ஜக்காரப்பள்ளி அருகே சாலையில் நடந்து சென்று கொண்டிருந்தார். அப்போது அந்த வழியாக சென்ற அரசு பஸ் அவர் மீது மோதியது.

இந்த விபத்தில் அவர் சம்பவ இடத்திலேயே இறந்தார். இதுகுறித்து தாலுகா போலீசுக்கு தகவல் தெரிவிக்கப்பட்டது. அதன்பேரில் போலீசார் விரைந்து சென்று டேவிட்டின் உடலை கைப்பற்றி பிரேத பரிசோதனைக்காக அரசு ஆஸ்பத்திரிக்கு அனுப்பி வைத்தனர். இந்த விபத்து குறித்து கிருஷ்ணகிரி தாலுகா போலீசார் வழக்குப்பதிவு செய்து விசாரணை நடத்தி வருகிறார்கள்.

வாகனம் மோதி பலி

கிருஷ்ணகிரியில் சேலம் தேசிய நெடுஞ்சாலையில் நமாஸ்பாறை மேம்பாலம் அருகில் 40 வயது மதிக்கத்தக்க ஆண் ஒருவர் சாலையில் நடந்து சென்று கொண்டிருந்தார். அப்போது அந்த வழியாக சென்ற வாகனம் அவர் மீது மோதியது. இதில் தூக்கி வீசப்பட்ட அவர் சம்பவ இடத்திலேயே இறந்தார். இந்த விபத்து குறித்து கிருஷ்ணகிரி தாலுகா போலீசார் விசாரணை நடத்தி வருகிறார்கள்.