தொழிலாளி உள்பட 2 பேர் சாவு

ராயக்கோட்டை

ராயக்கோட்டை, காவேரிப்பட்டணத்தில் வெவ்வேறு விபத்துகளில் தொழிலாளி உள்பட 2 பேர் இறந்தனர்.

தொழிலாளி

கிருஷ்ணகிரி மாவட்டம் ராயக்கோட்டை அருகே பெத்ததாளப்பள்ளி எம்.ஜி.ஆர். நகரை சேர்ந்தவர் முத்துராஜ் (வயது 42). கூலித்தொழிலாளி. சம்பவத்தன்று இவர் ராயக்கோட்டையில் இருந்து பழையூர் மாரியம்மன் கோவில் அருகே மோட்டார் சைக்கிளில் சென்றார். அப்போது எதிர்பாராதவிதமாக அவர் மோட்டார் சைக்கிளுடன் கீழே விழுந்து படுகாயம் அடைந்தார்.

இதையடுத்து அக்கம் பக்கத்தினர் அவரை மீட்டு கிருஷ்ணகிரி அரசு ஆஸ்பத்திரிக்கு அனுப்பி வைத்தனர். பின்னர் அவர் மேல்சிகிச்சைக்காக தர்மபுரி அரசு ஆஸ்பத்திரியில் அனுமதிக்கப்பட்டார். அங்கு சிகிச்சை பலனின்றி நேற்று முத்துராஜ் பரிதாபமாக உயிரிழந்தார். இந்த விபத்து குறித்து ராயக்கோட்டை போலீசார் வழக்குப்பதிவு செய்து விசாரணை நடத்தி வருகின்றனர்.

முதியவர் சாவு

காவேரிப்பட்டணம் அருகே உள்ள சுண்டேகுப்பம் கிருஷ்ணர் கோவில் பக்கமாக 75 வயது மதிக்கத்தக்க முதியவர் நேற்று முன்தினம் நடந்து சென்றார். அப்போது அந்த வழியாக சென்ற அடையாளம் தெரியாத வாகனம் அவர் மீது மோதி விட்டு நிற்காமல் சென்று விட்டது. இதில் அந்த முதியவர் சம்பவ இடத்திலேயே பரிதாபமாக இறந்தார்.

இந்த விபத்து குறித்து சுண்டேகுப்பம் கிராம நிர்வாக அலுவலர் சரண்யா காவேரிப்பட்டணம் போலீசில் புகார் செய்தார். அதன் பேரில் போலீசார் சம்பவ இடத்திற்கு சென்று முதியவரின் உடலை கைப்பற்றி பிரேத பரிசோதனைக்காக அரசு ஆஸ்பத்திரிக்கு அனுப்பி வைத்தனர். மேலும் இந்த விபத்து குறித்து போலீசார் வழக்குப்பதிவு செய்து விசாரணை நடத்தி வருகிறார்கள்.