வெவ்வேறு விபத்துகளில் 2 பேர் சாவு

கெலமங்கலம், உத்தனப்பள்ளியில் வெவ்வேறு இடங்களில் நடந்த விபத்துகளில் 2 பேர் இறந்தனர்.

வாலிபர்

கிருஷ்ணகிரி மாவட்டம் அஞ்செட்டி தாலுகா ஜேசுராஜபுரத்தைச் சேர்ந்தவர் அருள்தாஸ். இவரது மகன் ஆண்டோ ஹென்றி ஹர்தாஸ் (வயது 26). இவர் சம்பவத்தன்று இரவு கெலமங்கலம் அருகே பி.செட்டிப்பட்டி பகுதியில் மோட்டார்சைக்கிளில் சென்று கொண்டு இருந்தார். அப்போது அந்த வழியாக வந்த லாரி, மோட்டார்சைக்கிள் மீது மோதியது. இந்த விபத்தில் ஆண்டோ ஹென்றி ஹர்தாஸ் படுகாயம் அடைந்தார். அவரை அருகில் இருந்தவர்கள் மீட்டு சிகிச்சைக்காக தேன்கனிக்கோட்டை அரசு ஆஸ்பத்திரியில் சேர்த்தனர். பின்னர் மேல் சிகிச்சைக்காக அவர் கிருஷ்ணகிரி அரசு ஆஸ்பத்திரியில் அனுமதிக்கப்பட்டார். அங்கு தீவிர சிகிச்சை அளித்தும் பலனின்றி அவர் நேற்று முன்தினம் பரிதாபமாக இறந்தார். இந்த விபத்து குறித்து கெலமங்கலம் போலீசார் வழக்குப்பதிவு செய்து விசாரணை நடத்தி வருகிறார்கள்.

தனியார் நிறுவன ஊழியர்

தர்மபுரி மாவட்டம் பாலக்கோடு அருகே உள்ள மல்லுப்பட்டியைச் சேர்ந்தவர் முரளிதரன் (34). தனியார் நிறுவன ஊழியர். இவர் நேற்று முன்தினம் மோட்டார்சைக்கிளில் ஓசூர்-உத்தனப்பள்ளி சாலையில் உத்தனப்பள்ளி அருகே சானமாவு பக்கமாக சென்று கொண்டிருந்தார். அப்போது அந்த வழியாக சென்ற லாரி மோட்டார்சைக்கிள் மீது மோதியது.

இந்த விபத்தில் முரளிதரன் படுகாயமடைந்து சம்பவ இடத்திலேயே பரிதாபமாக இறந்தார். இதுகுறித்து உத்தனப்பள்ளி போலீசார் வழக்குப்பதிவு செய்து விசாரணை நடத்தி வருகிறார்கள்.