வெவ்வேறு விபத்துகளில் 2 பேர் சாவு

ஊத்தங்கரை

ஊத்தங்கரை, ஓசூர் பகுதிகளில் நடந்த வெவ்வேறு விபத்துகளில் தனியார் நிறுவன ஊழியர் உள்பட 2 பேர் இறந்தனர்.

முதியவர் சாவு

ஊத்தங்கரை அண்ணா நகரை சேர்ந்தவர் சுப்பிரமணி (வயது 75). சம்பவத்தன்று இவர் ஊத்தங்கரையில் உள்ள ஒரு திருமண மண்டபம் அருகில் நடந்து சென்றார். அப்போது அந்த வழியாக வந்த அடையாளம் தெரியாத வாகனம் சுப்பிரமணி மீது மோதி விட்டு நிற்காமல் சென்று விட்டது. இந்த விபத்தில் படுகாயமடைந்த அவரை அருகில் இருந்தவர்கள் மீட்டு ஊத்தங்கரை அரசு ஆஸ்பத்திரியில் சேர்த்தனர்.

பின்னர் மேல் சிகிச்சைக்காக அவர் கிருஷ்ணகிரி அரசு ஆஸ்பத்திரியில் அனுமதிக்கப்பட்டார். அங்கு தீவிர சிகிச்சை அளித்தும் பலனின்றி முதியவர் பரிதாபமாக இறந்தார். இதுகுறித்து ஊத்தங்கரை போலீசார் வழக்குப்பதிவு செய்து விசாரணை நடத்தி வருகிறார்கள்.

தனியார் நிறுவன ஊழியர்

ஓசூர் திம்மசந்திரம் பகுதியை சேர்ந்தவர் கவுரிசங்கர் (37). ஓசூர் சிப்காட்டில் உள்ள தனியார் நிறுவனம் ஒன்றில் ஊழியராக வேலை செய்து வந்தார். நேற்று முன்தினம் இரவு இவர் ஜூஜூவாடி சோதனைச்சாவடி பக்கமாக நடந்து சென்றார். அப்போது, அந்த வழியாக சென்ற அடையாளம் தெரியாத வாகனம் கவுரிசங்கர் மீது மோதியது.

இந்த விபத்தில் அவர் சம்பவ இடத்திலேயே இறந்தார். விபத்து குறித்து தகவல் அறிந்ததும் சிப்காட் போலீசார் விரைந்து சென்று இறந்த கவுரிசங்கரின் உடலை மீட்டு பிரேத பரிசோதனைக்காக ஓசூர் அரசு ஆஸ்பத்திரிக்கு அனுப்பி வைத்தனர். இந்த விபத்து குறித்து போலீசார் வழக்குப்பதிவு செய்து விசாரணை நடத்தி வருகிறார்கள்.