விவசாயி உள்பட 2 பேர் சாவு

ஓசூர்

ஓசூரில் வெவ்வேறு விபத்துகளில் விவசாயி உள்பட 2 பேர் இறந்தனர்.

விவசாயி

ஓசூர் அருகே சின்னபேளகொண்டப்பள்ளியை சேர்ந்தவர் சந்திரசேகர் (வயது42). விவசாயி. இவர் மோட்டார் சைக்கிளில் மத்திகிரி கால்நடை பண்ணை அருகே சென்று கொண்டு இருந்தார். அப்போது, எதிரே வந்த டிப்பர் லாரி மோட்டார் சைக்கிள் மீது மோதியது. இதில் சந்திரசேகர் படுகாயமடைந்தார்.

இதையடுத்து அக்கம் பக்கத்தினர் அவரை மீட்டு ஓசூர் அரசு மருத்துவமனைக்கு கொண்டு சென்றனர். ஆனால் வழியிலேயே அவர் பரிதாபமாக இறந்தார். இந்த விபத்து குறித்து மத்திகிரி போலீசார் வழக்குப்பதிவு செய்து விசாரணை நடத்தி வருகின்றனர்.

தொழிலாளி

ஓசூர் என்.ஜி.ஜி. காலனி 2-வது கிராசை சேர்ந்தவர் இமானுவேல் ஜெபசிங்கம் (45). இவர் ஓசூரில் உள்ள தனியார் நிறுவனத்தில் ஊழியராக வேலை செய்து வந்தார். சம்பவத்தன்று பாகலூர்- பேரிகை சாலையில் உள்ள ஒரு தனியார் திருமண மண்டபம் அருகே இவர் மோட்டார் சைக்கிளில் சென்றார்.

அப்போது திடீரென அவர் மோட்டார் சைக்கிளுடன் தவறி கீழே விழுந்து படு காயமடைந்தார். அக்கம் பக்கத்தினர் அவரை மீட்டு ஓசூர் அரசு மருத்துவமனையில் சேர்த்தனர். அங்கு சிகிச்சை பலனின்றி அவர் பரிதாபமாக உயிரிழந்தார். இது குறித்து பாகலூர் போலீசார் வழக்குப்பதிவு செய்து விசாரணை நடத்தி வருகின்றனர்.