லாரி மோதி அக்காள், தங்கை உள்பட 3 பேர் பரிதாப சாவு

தேன்கனிக்கோட்டை

தேன்கனிக்கோட்டை அருகே மொபட் மீது லாரி மோதிய விபத்தில் அக்காள், தங்கை உள்பட 3 பேர் பலியானார்கள்.

மொபட் மீது லாரி மோதல்

கிருஷ்ணகிரி மாவட்டம் தேன்கனிக்கோட்டை அருகே உள்ள இருதுக்கோட்டை கிராமத்தை சேர்ந்தவர் செல்வம். இவர் விடுதலை சிறுத்தைகள் கட்சியின் மாவட்ட துணை செயலாளராக இருந்து வருகிறார். இவருடைய மகள்கள் தமிழரசி (வயது 19), தமிழ்பிரியா (17). தமிழரசி தர்மபுரியில் உள்ள ஒரு தனியார் கல்லூரியில் பி.எஸ்சி. கார்டியாடிக் 2-ம் ஆண்டு படித்து வந்தார். தமிழ்பிரியா சேலத்தில் உள்ள தனியார் கல்லூரி ஒன்றில் பிசியோதெரபி படித்து வந்தார்.

இந்த நிலையில் அக்காள், தங்கைகளான தமிழரசியும், தமிழ்பிரியாவும் அதே ஊரைச் சேர்ந்த தனது உறவினர் முனிராஜ் மகன் அம்பேத்வளவன் (10) என்ற சிறுவனுடன மொபட்டில் நேற்று மதியம் தேன்கனிக்கோட்டைக்கு சென்றனர். சாப்பராணப்பள்ளி அருகே வளைவில் இருதுக்கோட்டையில் உள்ள ஒரு கோழிப்பண்ணைக்கு தீவனம் ஏற்றி சென்ற லாரி, மொபட் மீது நேருக்கு நேர் மோதியது.

சக்கரத்தில் சிக்கி 3 பேரும் சாவு

இதனால் நிலைதடுமாறி 3 பேரும் சாலையில் விழுந்து லாரி சக்கரத்தில் சிக்கினர். இதில் தமிழரசி, தமிழ்பிரியா, சிறுவன் அம்பேத்வளவன் ஆகிய 3 பேரும் உடல் நசுங்கி சம்பவ இடத்திலேயே துடிதுடித்து பரிதாபமாக இறந்தனர். இந்த விபத்து குறித்து தேன்கனிக்கோட்டை போலீஸ் நிலையத்திற்கு தகவல் தெரிவிக்கப்பட்டது.

அதன்பேரில் போலீசார் சம்பவ இடத்திற்கு விரைந்து வந்தனர். மேலும் விபத்து குறித்து தகவல் அறிந்ததும் இறந்தவர்களின் குடும்பத்தினர் மற்றும் உறவினர்கள் விரைந்து வந்து உடல்களை பார்த்து கதறி அழுதனர். இதையடுத்து போலீசார் 3 பேரின் உடல்களையும் கைப்பற்றி கிருஷ்ணகிரி அரசு மருத்துவமனைக்கு பிரேத பரிசோதனைக்கு அனுப்பி வைத்தனர். விபத்து குறித்து தேன்கனிக்கோட்டை போலீசார் வழக்குப்பதிவு செய்து விசாரணை நடத்தி வருகின்றனர்.

பரபரப்பு

விடுதலை சிறுத்தைகள் கட்சியின் மாவட்ட நிர்வாகியின் மகள்கள், ஒரு சிறுவன் லாரி மோதி இறந்த சம்பவம் குறித்து தகவல் அறிந்ததும் ஏராளமான கட்சி நிர்வாகிகள், உறவினர்கள் அரசு மருத்துவமனையில் திரண்டனர். இதனால் அந்த பகுதியில் பரபரப்பு ஏற்பட்டது.

இதையொட்டி துணை போலீஸ் சூப்பிரண்டு முரளி தலைமையில் போலீசார் பாதுகாப்பு பணியில் ஈடுபட்டனர். விபத்தில் அக்காள், தங்கை உள்பட 3 பேர் இறந்த சம்பவம் அந்த பகுதியில் சோகத்தை ஏற்படுத்தியது.