மோட்டார் சைக்கிள்கள் மீது லாரி மோதி தொழிலாளி பலி

குருபரப்பள்ளி:

பர்கூர் தாலுகா பெலவர்த்தி தின்னூர் கூட்டுரோடு பகுதியை சேர்ந்தவர் சவுந்திரம் (வயது 35). கூலித்தொழிலாளி. இவர் கடந்த 13-ந் தேதி மோட்டார் சைக்கிளில் சென்றார். அப்போது கிருஷ்ணகிரி- குப்பம் தேசிய நெடுஞ்சாலையில் சமத்துவபுரம் மாரியம்மன் கோவில் அருகே சென்றபோது பின்னால் வேகமாக வந்த லாரி மோட்டார் சைக்கிள் மீது மோதியது. இதில் சம்பவ இடத்திலேயே சவுந்திரம் இறந்தார். எனினும் கட்டுப்பாட்டை இழந்து ஓடிய லாரி எதிரில் மோட்டார் சைக்கிளில் வந்த பெரியமட்டாரப்பள்ளியை சேர்ந்த முதுகலை கல்லூரி மாணவர் கணேஷ்குமார் (21), தேசிப்பள்ளி அசோக்குமார் (26) ஆகியோர் மீதும் மோதியது. இதில் இருவரும் படுகாயமடைந்தனர். விபத்து குறித்து தகவல் அறிந்ததும் மகராஜகடை போலீசார் சம்பவ இடத்திற்கு சென்று படுகாயம் அடைந்த 2 பேரையும் மீட்டு சிகிச்சைக்காக ஆஸ்பத்திரிக்கு அனுப்பி வைத்தனர். பின்னர் பலியான சவுந்திரத்தின் உடலை கைப்பற்றி பிரேத பரிசோதனைக்காக கிருஷ்ணகிரி அரசு மருத்துவக்கல்லூரி மருத்துவமனைக்கு அனுப்பி வைத்தனர். இந்த விபத்து குறித்து மகராஜகடை போலீசார் விசாரணை நடத்தி வருகின்றனர்.