கெலமங்கலம் அருகே மொபட் மீது சரக்கு வேன் மோதி விவசாயி உள்பட 2 பேர் பலி

ராயக்கோட்டை

கெலமங்கலம் அருகே மொபட் மீது சரக்கு வேன் மோதிய விபத்தில் விவசாயி உள்பட 2 பேர் பலியானார்கள்.

விவசாயி

கிருஷ்ணகிரி மாவட்டம் கெலமங்கலம் அருகே உள்ள அஞ்செட்டி துர்க்கத்தை சேர்ந்தவர் நாராயணப்பா (வயது 59). விவசாயி. இவரும், அதே ஊரை சேர்ந்த முன்னாள் சத்துணவு ஊழியர் ஜோதியப்பா (65) என்பவரும் நேற்று மொபட்டில் கெலமங்கலத்திற்கு சென்றனர்.

அங்கு வேலையை முடித்து கொண்டு அவர்கள் அஞ்செட்டி துர்க்கத்திற்கு மொபட்டில் திரும்பி சென்று கொண்டிருந்தனர். அப்போது கெலமங்கலத்தில் இருந்து ராயக்கோட்டை நோக்கி சரக்கு வேன் வந்து கொண்டிருந்தது.

2 பேர் பலி

ஜக்கேரி அருகே ஒன்னுகுறுக்கி பகுதியில் வந்தபோது எதிர்பாராதவிதமாக சரக்குவேன் மொபட் மீது மோதியது. இதில் தூக்கி வீசப்பட்ட நாராயணப்பா படுகாயம் அடைந்து சம்பவ இடத்திலேயே பலியானார். ஜோதியப்பா படுகாயம் அடைந்து உயிருக்கு போராடினார்.

அவரை அருகில் இருந்தவர்கள் மீட்டு சிகிச்சைக்காக ஓசூர் அரசு ஆஸ்பத்திரியில் சேர்த்தனர். அங்கு சிகிச்சை பலனின்றி அவரும் பரிதாபமாக இறந்தார். இந்த விபத்து குறித்து தகவல் அறிந்ததும் கெலமங்கலம் போலீசார் சம்பவ இடத்திற்கு சென்று நாராயணப்பாவின் உடலை மீட்டு பிரேத பரிசோதனைக்காக தேன்கனிக்கோட்டை அரசு ஆஸ்பத்திரிக்கு அனுப்பி வைத்தனர். இந்த விபத்து குறித்து போலீஸ் இன்ஸ்பெக்டர் (பொறுப்பு) நாகராஜ் வழக்குப்பதிவு செய்து, விசாரணை நடத்தி வருகிறார்.