கல்யாண பசுபதீஸ்வரர் கோவிலில் தேவார இன்னிசை நிகழ்ச்சி

கரூர் கல்யாண பசுபதீஸ்வரர் கோவிலில் மகாஅபிஷேக குழு சார்பில் 25-ம் ஆண்டு ஆடி தெய்வ திருமண விழா நடைபெற உள்ளது. இதனையொட்டி நாளை (ஞாயிற்றுக்கிழமை) கல்யாண பசுபதீஸ்வரர் கோவிலில் உள்ள நால்வர் அரங்கில் கல்யாண பசுபதீஸ்வரர் சுவாமிக்கும், அலங்காரவள்ளி, சவுந்திரநாயகி அம்பாளுக்கும் ஆடி தெய்வ திருமண விழா நடைபெற உள்ளது. இந்த விழாவை முன்னிட்டு கடந்த 29-ந்தேதி கல்யாண பசுபதீஸ்வரர் கோவிலில் முகூர்த்தக்கால் நடப்பட்டது.

இதனைத்தொடர்ந்து நேற்று கொடிமர விநாயகருக்கு கணபதி பூஜையுடன் விழா தொடங்கியது. பின்னர் பக்தி இன்னிசை நடைபெற்றது. இதனைத்தொடர்ந்து கல்யாண பசுபதீஸ்வரர் கோவில் வளாகத்தில் 1,250 பள்ளி மாணவ, மாணவிகள் கலந்து கொண்ட தேவார இன்னிசை நிகழ்ச்சி நடைபெற்றது.

இன்று (சனிக்கிழமை) மாலை 4 மணியளவில் கணபதி வழிபாடு நடைபெற்று, ராஜகோபுரத்திற்கு 108 அடி உயர மாலை சாற்றப்படுகிறது. தொடர்ந்து கல்யாண பசுபதீஸ்வரர் கோவிலுக்கு 1,008 முளைப்பாரியுடன் சீர் தட்டுகள் கொண்டு வரும் விழா நடைபெற உள்ளது. பின்னர் 1,008 கலைஞர்கள் கலந்து கொள்ளும் பரத நாட்டிய நிகழ்ச்சி நடக்கிறது.