தினத்தந்தி புகார் பெட்டி: மக்கள் குறைகள் தொடர்பான பதிவுகள்

சேதமடைந்த பாலம்

விருதுநகர் அருகே சங்கரலிங்காபுரத்திலிருந்து கட்டனார்பட்டி செல்லும் சாலை முற்றிலும் சேதம் அடைந்து காட்சியளிக்கிறது. மேலும் அதே சாலையில் உள்ள தரைப்பாலமும் முற்றிலும் சேதம் அடைந்துள்ளதால் பொதுமக்கள் மிகுந்த சிரமத்திற்கு உள்ளாகும் சூழ்நிலை உள்ளது. எனவே சாலையையும், தரைப்பாலத்தையும் சீரமைக்க தகுந்த நடவடிக்கை எடுக்க வேண்டும்.

பழனிவேல், சங்ரலிங்காபுரம்.

ஆபத்தான மின்கம்பம்

விருதுநகர் அருகே ஒண்டிப்புலி நாயக்கனூர் கண்மாய் அருகே உள்ள மின் கம்பம் சேதமடைந்து பூச்சுகள் பெயர்ந்து கம்பிகள் வெளியே தெரிகின்றன. விபரீதம் ஏதும் நேருவதற்கு முன்பாக ஆபத்தான மின்கம்பத்தை அகற்றி விட்டு புதிய மின்கம்பம் அமைக்க அதிகாரிகள் நடவடிக்கை எடுக்க வேண்டும்.

மனோகரன், ஒண்டிப்புலி நாயக்கனூர்.

கூடுதல் பஸ்கள் வேண்டும்

விருதுநகர் மாவட்டம் வத்திராயிருப்பில் இருந்து ஸ்ரீவில்லிபுத்தூர், ராஜபாளையம் செல்ல போதுமான பஸ் வசதி இல்லை. இதனால் இந்த பகுதியில் மாணவ-மாணவிகள், வேலைக்கு செல்பவர்கள் என அனைவரும் குறிப்பிட்ட நேரத்திற்குள் செல்ல முடியாமல் அவதிப்படுகின்றனர். எனவே மேற்கண்ட வழித்தடத்தில் கூடுதல் பஸ் இயக்க நடவடிக்கை எடுக்கப்படுமா?

முத்துவேல், வத்திராயிருப்பு.

விபத்தை ஏற்படுத்தும் சாலை

விருதுநகர் மாவட்டம் நரிக்குடி யூனியன் முக்குளம் முதல் நதிக்கிராமம் வரை உள்ள சாலை சேதமடைந்து காணப்படுகிறது. இதனால் இந்த சாலை வழியாக செல்பவர்கள் பெரும் இன்னலுக்கு ஆளாகின்றனர். சேதமடைந்த சாலையால் சிறு, சிறு விபத்துகள் நிகழ்ந்த வண்ணம் உள்ளது. எனவே சாலையை சீரமைக்க அதிகாரிகள் நடவடிக்கை எடுக்க வேண்டும்.

வினோத், நரிக்குடி.

பொதுமக்கள் அவதி

விருதுநகர் மாவட்டம் சிவகாசி ரெயில் நிலையத்திலிருந்து செங்கமல நாச்சியார்புரம் செல்லும் சாலையின் ஒரு சில இடங்கள் குண்டும், குழியுமாக காட்சியளிக்கிறது. இதனால் பொதுமக்கள் அந்த பகுதியை கடந்து செல்ல அவதிப்படுகின்றனர். எனவே இந்த பகுதியை மாநகராட்சி அதிகாரிகள் ஆய்வு செய்து புதிய சாலை அமைக்க தேவையான நடவடிக்கை எடுக்க வேண்டும்.

குமரேசன், சிவகாசி.