தினத்தந்தி புகார் பெட்டி: மக்கள் குறைகள் தொடர்பான பதிவுகள்

சாலை சீரமைக்கப்படுமா?

விருதுநகர் மாவட்டம் சாத்தூர் தாலுகா அலுவலகம் எதிரே உள்ள முக்குராந்தல் பகுதி சாலை, நான்கு வழிச்சாலையில் படந்தால் சந்திப்பு சாலை ஆகியவை முற்றிலும் சேதமடைந்துள்ளது. இதனால் அவ்வழியாக செல்லும் வாகன ஓட்டிகள் மிகுந்த சிரமப்படும் சூழ்நிலை உள்ளது. எனவே பொதுமக்களின் சிரமத்தை கருத்தில் கொண்டு சாலைகளை விரைவாக சீரமைக்க நடவடிக்கை எடுக்க வேண்டும்.

சேதமடைந்த நிழற்குடை

விருதுநகர் அருகே பட்டம்புதூர் விலக்கில் உள்ள பயணிகள் நிழற்குடை முற்றிலும் சேதமடைந்து உள்ளது. இதனால் நிழற்குடைக்குள் நிற்கவே பொதுமக்கள் மிகவும் அச்சப்படுகின்றனர். எனவே விபரீதம் எதுவும் நடப்பதற்குள் புதிய நிழற்குடை அமைக்க நடவடிக்கை எடுக்க வேண்டும்.

நடவடிக்கை தேவை

விருதுநகர் மாவட்டம் ராஜபாளையம் ஊராட்சி ஒன்றியம், கிருஷ்ணாபுரம் கிராமத்தில் பன்றிகள் அதிக அளவில் சுற்றித்திரிகின்றன. மேலும் அதிக அளவிலான பன்றிகள் நோய் தாக்கி இறப்பதால் துர்நாற்றம் வீசுவதுடன் சுகாதார சீர்கேடு ஏற்பட்டு நோய் தொற்று பரவும் அபாயமும் உள்ளது. எனவே இதுகுறித்து தகுந்த நடவடிக்கை எடுக்க வேண்டும்.

பொதுமக்கள் அச்சம்

விருதுநகர் மாவட்டம் ராஜபாளையம் நகராட்சி பகுதிகளில் தெருநாய்கள் அதிக அளவில் சுற்றித்திரிகின்றன. இதனால் பொதுமக்கள் தங்கள் குழந்தைகளை வெளியில் அனுப்ப மிகவும் அச்சப்படுகின்றனர். எனவே தெரு நாய்களை பிடித்து அப்புறப்படுத்தவும் நாய்களுக்கு கருத்தடை சிகிச்சை செய்யவும் நடவடிக்கை எடுக்க வேண்டும்.

ஆக்கிரமிப்பு

விருதுநகர் மாவட்டம் சிவகாசி பகுதியில் உள்ள சில கண்மாய்களில் கருவேல மரங்கள் அதிகம் வளர்ந்து காணப்படுகிறது. இதனால் கண்மாயில் போதிய அளவு நீரை தேக்கி வைக்க முடியாத சூழல் உருவாகி உள்ளது. மேலும் நிலத்தடி நீர்மட்டம் பாதிக்கும் அபாயமும் உள்ளது. எனவே கருவேல மரங்களின் ஆக்கிரமிப்பை அகற்ற அதிகாரிகள் நடவடிக்கை எடுக்க வேண்டும்.

நோய் பரவும் அபாயம்

விருதுநகர் மாவட்டம் வெம்பக்கோட்டை மற்றும் அதன் சுற்றுவட்டார பகுதிகளில் கொசுக்களின் தொல்லை நாளுக்கு நாள் அதிகரித்து கொண்டே வருகிறது. ஆதலால் நோய் பரவும் அபாயம் உள்ளது. இதனால் இரவு நேரங்களில் மக்கள் தூங்க முடியாமல் அவதிப்படுகின்றனர். எனவே கொசுக்களை ஒழிக்க தகுந்த நடவடிக்கை எடுக்கப்படுமா?

வீணாகும் குடிநீர்

விருதுநகர் மாவட்டம் அருப்புக்கோட்டை பழைய போஸ்ட் ஆபீஸ் தெரு பகுதியில் சில நாட்களாக குடிநீர் குழாய் உடைந்து தண்ணீர் வீணாக செல்கிறது. இதனால் இப்பகுதியில் குடிநீர் தட்டுப்பாடு ஏற்படும் நிலை உள்ளது. எனவே இந்த குடிநீர் குழாய் உடைப்பை சரிசெய்ய அதிகாரிகள் நடவடிக்கை எடுக்க வேண்டும்.

சேதமடைந்த பாலம்

விருதுநகர் மாவட்டம் ஆலங்குளம் பகுதியில் இருந்து சுண்டங்குளம் செல்லும் சாலையில் உள்ள தரைப்பாலம் சேதமடைந்து காணப்படுகிறது. இதனால் பள்ளி, கல்லூரி மற்றும் வேலைக்கு செல்பவர்கள் மிகவும் சிரமப்படுகிறார்கள். விபத்து எதுவும் நடப்பதற்குள் இந்த தரைப்பாலத்தை சீரமைக்க நடவடிக்கை எடுக்க வேண்டும்.

சாலையில் சுற்றித்திரியும் மாடுகள்

விருதுநகர் மாவட்டம் ஸ்ரீவில்லிபுத்தூர் சாலை பகுதிகளில் ஆடு, மாடு போன்ற கால்நடைகள் அதிக அளவில் சுற்றித்திரிகின்றன. இதனால் வாகன ஓட்டிகளுக்கு விபத்து ஏற்படும் அபாயநிலை உருவாகி உள்ளது. எனவே இதுகுறித்து சம்பந்தப்பட்ட அதிகாரிகள் நடவடிக்கை எடுக்க வேண்டும்.

தேங்கி நிற்கும் கழிவுநீர்

விருதுநகர் மாவட்டம் இனாம்ரெட்டியபட்டி ஊராட்சியில் அருந்ததியர் குடியிருப்பு பகுதியில் முறையான கழிவுநீர் வாருகால் வசதி இல்லாததால் கழிவுநீர் தேங்கி நிற்கிறது. மேலும் அருகில் உள்ள குடியிருப்பு பகுதி மக்களுக்கு துர்நாற்றமும் கொசு தொல்லையால் நோய் பரவும் அபாயமும் உள்ளது. எனவே முறையான வாருகால் வசதி செய்து தர சம்பந்தப்பட்ட அதிகாரிகள் நடவடிக்கை எடுக்க வேண்டும்.