23,578 பேருக்கு நகை கடன் திட்டத்தில் தள்ளுபடி

ராணிப்பேட்டை மாவட்டத்தில் 23,578 பேருக்கு நகை கடன் திட்டத்தில் தள்ளுபடி செய்யப்பட்டுள்ளது.

ராணிப்பேட்டை மாவட்ட கலெக்டர் பாஸ்கரபாண்டியன் வெளியிட்டுள்ள செய்திக்குறிப்பில் கூறியிருப்பதாவது:-

வேலூர் மாவட்ட மத்திய கூட்டுறவு வங்கியின் கீழ் ராணிப்பேட்டை மாவட்டத்தில், 12 வங்கி கிளைகள் உள்ளன. தமிழக அரசு அறிவித்த 5 பவுன் நகைக்கடன் தள்ளுபடி திட்டத்தில் இந்த கிளைகளில் 2,037 பயனாளிகளுக்கு ரூ.7 கோடியே 59 லட்சம் நகைக்கடனும், 4 நகர கூட்டுறவு வங்கிகளில் 4,974 பயனாளிகளுக்கு ரூ.18 கோடியே 70 ஆயிரம் நகைக்கடனும் தள்ளுபடி செய்யப்பட்டுள்ளது. அதேபோல் 53 தொடக்க வேளாண்மை கூட்டுறவு கடன் சங்கங்களில் 11 ஆயிரத்து 463 பயனாளிகளுக்கு ரூ.35 கோடியே 13 லட்சம் நகைக்கடனும், 9 நகர கூட்டுறவு சங்கங்களில் 4,201 பயனாளிகளுக்கு ரூ.13 கோடியே 23 லட்சம் கடனும் 2 கூட்டுறவு விற்பனை சங்கங்களில் 55 பயனாளிகளுக்கு ரூ.14 லட்சம் கடனும் தள்ளுபடி செய்யப்பட்டுள்ளது. மேலும் 3 தொடக்க வேளாண்மை கூட்டுறவு மற்றும் ஊரக வளர்ச்சி வங்கிகளின் சார்பில் 848 பயனாளிகளுக்கு ரூ.2 கோடியே 51 லட்சம் கடன் தள்ளுபடி செய்யப்பட்டுள்ளது.

இதன் மூலம் மொத்தம் 23 ஆயிரத்து 578 பயனாளிகளுக்கு 5 பவுன் நகை கடன் தள்ளுபடி திட்டத்தின் கீழ் ரூ.76 கோடியே 67 லட்சம் நகை கடன் தள்ளுபடி செய்யப்பட்டுள்ளது. இவ்வாறு அவர் அதில் தெரிவித்துள்ளார்.