திருச்செந்தூர்வட்டாரவிவசாயிகளுக்குமானிய விலையில் நெல் விதைகள் வினியோகம்

குலசேகரன்பட்டினம்:

திருச்செந்தூர் வட்டார விவசாயிகள் பிசான பருவத்திற்கு தேவையான அதிக மகசூல் தரக்கூடிய நெல் ரகங்கள் வேளாண்மை விரிவாக்க மையத்தில் விவசாயிகளுக்காக இருப்பு வைக்கப்பட்டுள்ளது. தண்டுதுளைப்பான், புகையான், இலைசுருட்டு புழு உள்ளிட்ட நெல்பயிரை தாக்கும் பூச்சிகளுக்கும், குலைநோய், இலைப்புள்ளி நோய் உள்ளிட்ட நோய்களுக்கும் எதிர்ப்புத்திறன் கொண்ட பிசான பருவத்திற்கு ஏற்ற நெல் ரகங்களான டி.பி.எஸ் 5 மற்றும் டி.கே.எம்.13 ஆகிய சான்று விதைகள் திருச்செந்தூர் வட்டார வேளாண்மை விரிவாக்க மையங்களில் மானிய விலையில் விற்பனைக்கு தயாராக வைக்கப்பட்டுள்ளது. டி.பி.எஸ்.5 ரகம் 110 முதல் 115 நாட்கள் வயதுடையது. நல்ல அரவைத்திறன் கொண்டது. மேலும் அம்பை 16 ரகத்தை விட அதிக மகசூல் தரக்கூடியது. சராசரியாக 6,300 கிலோ வரை மகசூல் தரக்கூடியது. டி.கே.எம்.13 ரகம் 130 நாட்கள் வயதுடையது. இது கர்நாடக பொன்னி ரகத்தை விட 10 சதவீதம் அதிக மகசூல் தரக்கூடியது. இவ்விதைகள் தேசிய வேளாண் வளர்ச்சி திட்டத்தின் கீழ் விவசாயிகளுக்கு மானிய விலையில் வினியோகம் செய்யப்படுகின்றன. தேவைப்படும் விவசாயிகள் தங்கள் ஆதார் நகல் மற்றும் சர்வே எண்ணுடன் திருச்செந்தூர் வட்டார வோளாண்மை விரிவாக்க மையங்களை அணுகி பயன்பெறலாம்.

இந்த தகவலை, வேளாண்மை உதவி இயக்குனர் வெங்கடசுப்பிரமணியன் தெரிவித்துள்ளார்.