டாக்டர் சிவந்தி ஆதித்தனார் மனவளர்ச்சி குன்றியோர் பள்ளியில் முப்பெரும் விழா

வாசுதேவநல்லூர்:

வாசுதேவநல்லூர் மகாத்மா காந்திஜி சேவா சங்கத்தின் மூலம் செயல்படும் பத்மஸ்ரீ டாக்டர் சிவந்தி ஆதித்தனார் மனவளர்ச்சி குன்றியோர் சிறப்புப்பள்ளி 11-வது ஆண்டு விழா, மாணவர்களுக்கு பரிசளிப்பு விழா, பாராட்டு விழா ஆகிய முப்பெரும் விழா நடந்தது. ஆசிரியர் ராமசாமி தலைமை தாங்கினார். தமிழரசன், குருசாமி பாண்டியன் ஆகியோர் முன்னிலை வகித்தனர். பள்ளி செயலாளர் கு.தவமணி அனைவரையும் வரவேற்றார். பள்ளி தலைமை ஆசிரியர் சங்கரசுப்பிரமணியன் ஆண்டறிக்கை வாசித்தார்.

விழாவில் பாலகிருஷ்ணன், ஓய்வுபெற்ற தாசில்தார் வேலுச்சாமி, வக்கீல் செந்தில்குமார், டாக்டர் மயில்வாகனன் ஆகியோர் சிறப்பு விருந்தினர்களாக கலந்து கொண்டனர். வாசுதேவநல்லூர் நகர பஞ்சாயத்து தலைவர் லாவண்யா ராமேஸ்வரன், டாக்டர் சந்திரசேகர் ஆகியோர் மாணவ-மாணவிகளுக்கு பரிசுகள் வழங்கினார். ஓய்வு பெற்ற தமிழ் ஆசிரியர் கணேசன் வாழ்த்தி பேசினார். பள்ளி மாணவ-மாணவிகளின் ஆடல்-பாடல், யோகா நிகழ்ச்சி நடந்தது. சிறப்பு ஆசிரியர்கள் சாந்தி, ஹெலன் இவாஞ்சலின், இயன்முறை மருத்துவர் புனிதா, உதவி ஆசிரியர் மகேஸ்வரி, கவிதா, முத்துலட்சுமி, அருண் மற்றும் பலர் கலந்து கொண்டனர்.