மாமியாரை அரிவாளால் வெட்டிய டிரைவர் கைது

சிக்கல்:

சிக்கலில், சொத்தை பிரித்து தர கேட்டதால் ஏற்பட்ட தகராறில் மாமியாரை அரிவாளால் வெட்டிய டிரைவரை போலீசார் கைது செய்தனர்.

துக்க நிகழ்ச்சி

நாகை ஒன்றியம் சிக்கல் ஊராட்சி பனைமேடு மெயின் ரோட்டை சேர்ந்தவர் கண்ணகி. இவருடைய கணவர் வேலாயுதம். இவர் கடந்த 30 நாட்களுக்கு முன்பு இறந்து விட்டார். சம்பவத்தன்று வேலாயுதத்துக்கு 30-ம் நாள் துக்க நிகழ்ச்சி நடந்தது.

இதில் அவருடைய மகள்கள், மருமகன்கள் மற்றும் உறவினர்கள் கலந்து கொண்டனர். இந்த நிலையில் கண்ணகியின் 3-வது மகளின் கணவர் பனைமேடு காலனி தெருவை சேர்ந்த டிரைவரான ரமேஷ் (வயது40), சொத்து பிரிப்பது தொடர்பான மாமியார் கண்ணகியிடம் கேட்டுள்ளார்.

அரிவாள் வெட்டு

அதற்கு கண்ணகி தனது கணவர் இறந்து 30 நாட்கள் தான் ஆகிறது. அதற்குள் சொத்து பிரிப்பதற்கு என்ன அவசரம் என்று கேட்டு உள்ளார். இதனால் அவர்களுக்கு இடையே தகராறு ஏற்பட்டது.

இதில் ஆத்திரம் அடைந்த ரமேஷ் தான் மறைத்து வைத்திருந்த அரிவாளால் மாமியார் கண்ணகியை வெட்டி விட்டு அவரது மகனின் ஸ்கூட்டரை அடித்து உடைத்து சேதப்படுத்தி விட்டு தப்பி ஓடினார்.

கைது

இதில் காயம் அடைந்த கண்ணகியை உறவினர்கள் மீட்டு சிகிச்சைக்காக நாகை அரசு மருத்துவக்கல்லூரி ஆஸ்பத்திரியில் சேர்த்தனர். அங்கு அவர் சிகிச்சை பெற்று வருகிறார்.

இதுகுறித்த புகாரின் பேரில் கீழ்வேளூர் போலீசார் வழக்குப்பதிவு செய்து ரமேசை கைது செய்து விசாரணை நடத்தி வருகின்றனர்.