டிரான்ஸ்பார்மரில் மோட்டார் சைக்கிள் மோதி டிரைவர் பலி

ராஜாக்கமங்கலம்,:

ராஜாக்கமங்கலம் அருகே டிரான்ஸ்பார்மரில் மோட்டார் சைக்கிள் மோதியதில் லாரி டிரைவர் பரிதாபமாக பலியானார்.

லாரி டிரைவர்

தென்தாமரைகுளம் அருகே உள்ள பொற்றையடி பகுதியை சேர்ந்த சுயம்புலிங்கம் நாடார் மகன் முருகன் (வயது 47), லாரி டிரைவர். இவருக்கு மனைவியும், ஒரு மகளும், ஒரு மகனும் உள்ளனர்.

இந்தநிலையில் நேற்று மாலையில் முருகன் தனது நண்பர் ஒருவரை ராஜாக்கமங்கலம் அருகே உள்ள பேயோட்டில் விடுவதற்காக மோட்டார் சைக்கிளில் வந்தார். அவரை பேயோட்டியில் இறக்கி விட்ட முருகன் மீண்டும் வீட்டுக்கு செல்வதற்காக ராஜாக்கமங்கலம் நோக்கி சென்று கொண்டிருந்தார்.

டிரான்ஸ்பார்மர் மீது மோதல்

அப்போது, காக்காதோப்பு எம்.ஜி.ஆர்.நகர் அருகே சென்றபோது, திடீரென மோட்டார் சைக்கிள் கட்டுப்பாட்டை இழந்து தாறுமாறாக ஓடி சாலையோரம் நின்ற டிரான்ஸ்பார்மர் மீது பயங்கரமாக மோதியது. இந்த விபத்தில் முருகனுக்கு தலையில் பலத்த காயம் ஏற்பட்டு சம்பவ இடத்திலேயே மூளைசிதறி பரிதாபமாக இறந்தார்.

இதுபற்றி தகவல் அறிந்து வந்த ராஜாக்கமங்கலம் போலீசார் முருகனின் உடலை கைப்பற்றி பிரேத பரிசோதனைக்காக ஆசாரிபள்ளம் அரசு ஆஸ்பத்திரிக்கு அனுப்பி வைத்தனர். மேலும், இதுகுறித்து போலீசார் வழக்குப்பதிவு செய்து விசாரணை நடத்தி வருகிறார்கள்.