வரத்து அதிகரிப்பால் பூக்களின் விலை கடும் வீழ்ச்சி

பூக்கள் பயிர்

கரூர் மாவட்டம் நொய்யல், மரவாபாளையம், குளத்துபாளையம், ஓலப்பாளையம், ஒரம்புப்பாளையம், நல்லிக்கோவில், கொங்குநகர், மூலிமங்கலம், பேச்சிப்பாறை, நடையனூர், கவுண்டன்புதூர், செட்டி தோட்டம் உள்ளிட்ட பல்வேறு பகுதிகளில் பல்வேறு வகையான பூக்கள் பயிர் செய்யப்பட்டுள்ளது.

இங்குவிளையும் பூக்களை விவசாயிகள் உள்ளுர் பகுதிகளுக்கு வரும் வியாபாரிகளுக்கும், பரமத்தி வேலூரில் செயல்பட்டுவரும் 2 பூக்கள் ஏல மார்க்கெட்டிற்கும் கொண்டு சென்று விற்பனை செய்து வருகின்றனர். மாவட்டத்தின் பல்வேறு பகுதிகளை சேர்ந்த வியாபாரிகள் பூக்களை ஏலம் எடுக்க வருகின்றனர்.ஏலம் எடுத்த உதிரிப் பூக்களை பல்வேறு ரகமான மாலைகளாகவும், தோரணங்களாகவும் கட்டி விற்பனை செய்து வருகின்றனர். சில வியாபாரிகள் உதிரிப்பூக்களைபிளாஸ்டிக் கவரில் போட்டு உள்ளூர் பகுதிகளுக்கு கொண்டு சென்று விற்பனை செய்து வருகின்றனர்.

விலை வீழ்ச்சி

கடந்த வாரம் நடைபெற்ற ஏலத்தில் ஒரு கிலோ குண்டுமல்லி ரூ.500-க்கும், சம்பங்கி ரூ.120- க்கும், அரளி ரூ.180- க்கும், ரோஜா ரூ.200-க்கும், முல்லைப் பூ ரூ.500-க்கும், செவ்வந்திப்பூ ரூ.220- க்கும், கனகாம்பரம் ரூ.600-க்கும் விற்பனையானது.தற்போது நடந்த ஏல‌த்தில் குண்டு மல்லி கிலோ ரூ.300-க்கும், சம்பங்கி ரூ.40-க்கும், அரளி ரூ.80-க்கும், ரோஜா ரூ.150-க்கும், முல்லைப் பூ ரூ.300-க்கும், செவ்வந்திப்பூ ரூ.150-க்கும், கனகாம்பரம் ரூ.300-க்கும் விற்பனையானது. கோவில் கும்பாபிஷேகம், திருமண நிகழ்வுகள் இல்லாததாலும், பூக்களின் வரத்து அதிகரித்துள்ளதாலும் விலை கடும் வீழ்ச்சி அடைந்துள்ளதாக வியாபாரிகள் தெரிவித்தனர்.